دۆناڵد ترەمپ ئیخوان موسلیمین دەخاتە لیستی تیرۆرەوە

دۆناڵد ترەمپ، سەرۆکی ئەمریکا رایگەیاند، گرووپی ئیخوان موسلیمین وەک "رێکخراوێکی تیرۆریستیی بیانی" دەناسێنێت. بڕیارەکە دوای چەند رۆژێک دێت لە بڵاوکردنەوەی راپۆرتێکی درێژ لەسەر چالاکییەکانی ئیخوان و زیادبوونی نیگەرانییەکان لەنێو ئیدارەی ترەمپدا.

رۆژی یەکشەممە 23-11-2025 دۆناڵد ترەمپ بە ماڵپەڕی (جەست زە نیوز)ـی ئەمریکی راگەیاند، ئیخوان موسلیمین دەخاتە لیستی تیرۆرەوە.

ترەمپ گوتیشی: "ئەمە بە تووندترین و بەهێزترین شێوە دەکرێ. خەریکە بەڵگەنامە کۆتاییەکان دادەڕێژرێن."

ئیخوان موسلیمین گرووپێکی ئیسلامییە، نزیکەی سەدەیەک لەمەوبەر لە میسر دامەزراوە، بەڵام لق و بزووتنەوەی سەربەخۆی لە سەرتاسەری جیهاندا هەیە.

ئەم بڕیارە دوای ئەوە دێت کە هەفتەی رابردوو گرێگ ئابۆت، حاکمی کۆماریی تێکساس، هەردوو گرووپی ئیخوان موسلیمین و ئەنجوومەنی پەیوەندییە ئەمریکی- ئیسلامییەکان (CAIR)ـی وەک "رێکخراوی تیرۆریستیی بیانی و رێکخراوی تاوانکاریی نێودەوڵەتی" ناساند.

ئابۆت رایگەیاند: "ئیخوان موسلیمین و CAIR ماوەیەکی زۆرە ئامانجەکانیان روون کردووەتەوە: "سەپاندنی زۆرەملێی شەریعەت و دامەزراندنی سەروەریی ئیسلام بەسەر جیهاندا."

هاوکات، سیناتۆر تێد کروز و چەندین سیناتۆری دیکەی کۆماری، لە مانگی تەممووزدا پرۆژەیاسایەکیان بۆ ناساندنی ئیخوان وەک "رێکخراوێکی تیرۆریستی" پێشکەش کردبوو.

کروز رایگەیاند: "یەکێک لە لقەکانی [ئیخوان] حەماسە، کە لە 7ـی تشرینی یەکەمدا خراپترین کۆمەڵکوژیی جووەکانی لە دوای هۆلۆکۆستەوە کرد. ئەوان بە رووخاندن و لەناوبردنی ئەمریکا و حکومەتە نائیسلامییەکانی دیکەوە پابەندن."

مارکۆ روبیۆ، وەزیری دەرەوەی ئەمریکا لە مانگی ئابدا ئاماژەی بەوە کردبوو کە ناساندنی ئیخوان "کاری لەسەر دەکرێت"، بەڵام پرۆسەکە درێژخایەن و وردە.

چەندین وڵاتی رۆژهەڵاتی نێوەڕاست پێشتر هەنگاویان دژی ئیخوان ناوە؛ میسر و ئوردن گرووپەکەیان قەدەخە کردووە و سعودیە، ئیمارات و بەحرێنیش وەک "رێکخراوێکی تیرۆریستی" وەسفیان کردووە.

لە بەرامبەر بڕیارەکەی حاکمی تێکساس، CAIR رایگەیاند، ناویان زڕێنراوە و هێرشی کردە سەر ئابۆت. رێکخراوەکە لە راگەیێندراوێکدا گوتی: "گرێگ ئابۆت سیاسەتمەدارێکی پشتیوانی ئیسرائیلە و چەندین مانگە خەریکی وروژاندنی هیستریای دژە موسڵمانانە."

CAIR گوتیشی: "بە ناوزڕاندنی دامەزراوەیەکی دیکەی دیاری موسڵمانانی ئەمریکا بە تیۆریی پیلانگێڕیی پووچەڵکراو و گوتەی هەڵبەستراو، بەڕێز ئابۆت جارێکی دیکە نیشانیدا کە پێشینەی سەرەکیی ئەو پێشخستنی رق و کینەی دژە موسڵمانانە، نەک خزمەتکردنی خەڵکی تێکساس."

ئیخوان لە ساڵی 1928 لەلایەن حەسەن بەنناوە دامەزراوە. سەید قوتب، بیرمەندێکی سەرەکیی ئیخوان موسلیمینە.

پەیمانگای لێکۆڵینەوە لە دژەجوویی و سیاسەتی جیهانی لە راپۆرتێکیدا رایگەیاند: "ئیخوان موسلیمین وەک ئیلهامبەخشی فیکریی هەموو گرووپە ئیسلامییەکان (و لقە جیهادییەکانیان) دەردەکەوێت کە ئەمڕۆ کار دەکەن، وەک داعش، قاعیدە و حەماس."