ئارام قادر، وەك سیاسیەکی دۆڕاو

ليست هناك تعليقات


عوسمان گوڵپی

لە کاتێکدا زۆر شت هەبوو بۆ وتن و نەمانوت و بێدەنگیمان هەڵبژارد، بەڵام بەداخەوە کاك ئارام قادر هەمیشە سودی خراپی لە بێدەنگی بەرامبەرەکانی بینیوە، لە بری ئەوەی ڕێز لە بێدەنگیان بگرێت.

لەم چەند ڕۆژەی ڕابردوودا، کاتێك هاوڕێکانی خۆی لە هاوپەیمانی و لە ئاستی باڵاو بە زۆرینە بڕیاری لادانی(ئەیوب نیعمەت قادر)یان لە سەرۆکی حیزبەکە و دەرکردنی یەکجاری لە هاوپەیمانیدا، ئیدی سەرۆکی لادراو کە ناسراوە بە (ئارام قادر) لە پەشۆکاویدابێت یان لە شێواوی دەرونیدا، کەوتۆتە قسەی نارێك و سڵ لە وتنی هیچ شتێک ناکاتەوە، تەنانەت بۆ مایکێك دەگەرێت قسەیەکی تێدا بکات، بەداخەوە لە بەشێکی قسەکانیدا ڕوو دەکاتە ئەوانەش کە ماوەی دووساڵ و نۆ مانگە دوور و نزیك هیچ پەیوەندیەکمان پێوەی نەماوە و لە ڕۆژی دەستلەکار کێشانەوەوە تا ئەمڕۆ خۆمان لاداوە لە باسکردنی لە میدیاو تۆڕە کۆمەڵایەتیەکان، بەلام دیارە ئەو سودی خراپی لە م بێدەنگیە بینیوە، بەڵام ڕەنگە ئیدی پێویست بەم نوسینەو نوسینیتریش بکات

لە کۆتایی ساڵی ٢٠١٨دا پێکەوە بە ئامانجی ئەوەی هاوپەیمانی بکەینە هێزێکی ئۆپۆزسیۆنی خاوەن پێگەی ئامانجدار بەردەوامیمان هەڵبژارد، کە لە راستیدا وەك پرۆژەیەکی نوسراو هاوپەیمانی نمونەیەکی جوان بوو، ڕێك پێچەوانەی بەکردارکردنی.

لە یەکەم کۆنگرەدا کاك ئارام قادرمان کردە سەرۆکی هاوپەیمانی نیشتمانی، بە هیوای ئەوەی کەسی شیاومان بۆ شوێنی شیاو هەڵبژاردبێ، بە تایبەت کە مامۆستا محمد ڕەوف ئامادەی وەرگرتنی سەرۆکایەتی هاوپەیمانی نەبوو، ئیدی ئەو پۆستە یەکلا بویەوە بۆ کاك ئارام قادر.

ناچمە سەر ئەوەی بە چ هیوایەکی گەورەوە دەستماندایە ئەم هێزە نوێیە، بەبێ ئەوەی بزانین ئەو کەسەی کردومانەتە سەرۆکی حیزبەکە، نەك بۆ سەرۆکایەتی گونجاو نیە، بەڵکو تەنانەت بۆ ئەوەش گونجاو نیە کە ئاگاداری زانیاریەکانی حیزبیش بێت، چجای ئەوەی چارەنوسی هێزێکی سیاسی و سەدان گەنجی خوێنگەرمی دلسۆزی بکەوێتە دەست.

هاودیدان زۆر دڵسۆزانە و بەبێ ئەوەی چاویان لە هیچ بەرژەوەندیەکی تایبەتیبێت لە خەمی فراوانکردن و سەرخستنی هاوپەیمانی بووین، لە خەمی ئاشتکردنەوەی ئەوانەدا بووین نیگەران بوون، بێ ئاگا لەوەی خەونەکانی سەرۆکی حیزبەکە ڕێك پێچەوانەی خەونەکانی هاودیدانن، ئەمان لە خەمی بەرژەوەندی گشتی ئەویش لە خەمی بەرژەوەندی تایبەت، ئەمان لە خەمی فراوانکردن و کردنی بە هێزێکی ئۆپۆزسیۆنی ڕاستەقینە و سەرۆکیش لە خەمی کردنیەتی بە دووکانی سیاسی و دەستکەوت و هەر واشی کرد

هەربۆیە نزیکەی ساڵێك لەم کێشمەکێشەدا بووین، تا گەشتینە ئەو باوەڕەی کە باشترین هەنگاوێك هەڵیگرین ئەوەیە کە کۆتایی بەم نیمچە دوکانە بهێنین(هەویرێکی ئاو کێشە) بەڵێ لە مانگی سێی ٢٠٢٠ دا کۆتایمان بەوە هێنا کە توانای خۆمان و کاتی خۆمان لە جێگایەکدا بخەینەگەرکە ڕۆژ بە ڕۆژ لە بەرژەوەندی گشتی دوور دەکەوێتەوەوکراوەتە ئامرازی بەدەستهێنانی بەرژەوەندی تایبەتی.

لە دیمانەکانی ئەم هەفتەیەی سەرۆکی دەرکراوی هاوپەیمانیدا چەندین جارە بۆ بەرامبەرەکانی دەستەواژەکانی (بەرژەوەندیخواز، پۆست ویست و دەستی ئەملاو ئەولاو چەندین ڕستەی نادروست بەکار دەهێنێت) وەك سڕینی دەستە چەورەکانی بەخەڵکیتردا

ئەگەرچی نەمدەویست قسەی لەسەر بکەم بە چەندین ئیعتبار، بەڵام کەسێك بۆخۆی ڕێز لە ڕابردوو و پێگە و تەمەنی خۆی نەگرێت و هەموو ڕێگایەك بۆ شکاندنی بەرامبەرەکانی بگرێتەبەر، ئیدی دەبێت بەرپرسیارێتی وەڵامەکان بگرێتە ئەستۆی خۆی نەك کەسیتر.

لە چەند وێستەگەیەکدا لەگەڵ کاك ئارام کارمان پێکەوە کردوە و تەواوی توانای خۆم بە گەرخستوە بۆ ئەو کارەی باوەڕم پێی بوە، جا لە هەر ئاستێك بووبم، بەڵام کاتێك تێگەشتم کە ئارام قادر نەك قسە و کرداری یەك ناگرێتەوە بەڵکو ئەسڵەن دوو کارەکتەری زۆر جیاوازن و شارەزایی و ئەزمونی زۆری لە شاردنەوەی دیوی ڕاستەقینەی خۆی هەیە، بەجۆرێك بۆ ناسینەوەی ماسکەکانی کاتێکی زۆری دەوێت، وەك خۆی دەڵێت ٤٠ ساڵە سەرقاڵی سیاسەت و کاری حیزبیە، کە لە ڕاستیدا من پێموایە ئەو هیچ کات کاری حیزبی و سیاسی نەکردوە، بەڵکو حیزب و سیاسەتی وەك کەڤەر بەکار هێناوە و سەرقاڵی ئەو شتانە بوە کە بەتەنیشت حیزبایەتی و سیاسەتەوە دەکرێن و زۆر لێزانانە بەرژەوەندیەکانی تێکەل بە کاری حیزبی و سیاسی کردوە.

ئارام قادر و هاوڕێکانی

یەکێك لە سیفاتەکانی ئارام قادر ئەوەیە، کە هەموو ڕێگاکانی شکاندن بەکار دەهێنێت، سڵناکاتەوە لەوەی دەیکات و دەیڵێت، چەکی دەستی بۆ بەرامبەرەکانی(تۆمەت و درۆ و ناوزڕاندنە) بەبەزاندنی سنورە ئەخلاقی و ئاینیەکانیشەوە، زۆر ئاسان پیشەکانی خۆی دەخاتە پاڵ ئەوانیتر، تەنها بۆ ئەوەی ناشیرینیەکانی بشارێتەوە، ناشیرینیەك کە مرۆڤ بچوك بچوك دەکاتەوە.

تۆ تا ئەوکاتە باشیت کە ڕەخنەکانت ڕووی لەو نیە، کە ڕەخنەت گرت و بوویتە ڕێگر لەبەردەم بەرژەوەندیەکانیدا، ئیدی دەبیتە دەستی ئەم حیزب و ئەو حیزب، دەبیتە پۆست ویست و بەرژەوەندیخواز و دەیان تۆمەتیتری ناشیرین، لە کاتێکدا بۆخۆی وەك کەسی یەکەم، تەواوی حیزب و هاودید و گەنجە دڵسۆزەکانی کردە قوربانی ، بەداخەوە چۆن بۆ ناشیرینکردنی بەرامبەر هیچ سنورێکی نیە، ئاواش لە پێناو بەرژەوەندی و تاکڕەویدا هیچ سنورێك ناناسێ، ڕۆژێك لە بەردەرگای پارتی دەبینرێت ورۆژێکیتر دەبیتە یەکیەتیەکی عەیارە ٢٤ و دەنگدەری یەکیەتی، لە تیڤیش لە هەموان ناڕازیترە، کەی نانی لە قسە وتندابوو بە بەرهەم ساڵح قسەی پێدەڵێت و دواتریش بۆ تیکەیەکی چەور دەچێتە کۆشکی کۆماری بۆ دیداری، بەرلەوەی بەرهەم ساڵح بگەڕێتەوە مێرگەپان ئەو لە دەرگاکە سەرەی چوونە ژوورەوەی گرتوە، خۆی بە دامەزرێنەری سێ حیزبی ئیسلامی دەزانێت و دوای بوونە پەرلەمانتار و خانەنشین بوونی، پشت لە ڕابردووی دەکات و ڕۆژانە قسە لەسەر هاوڕێکانی دەکات، بەبێ ئەوەی بیر بکاتەوە ئایا بۆچی لە تەواوی هاوڕێیانی سەرکردایەتی ئەو سێ حیزبە هیچیان متمانەیان پێی نیەو لەگەڵی نین؟ بۆچی بە تەنهاو کەنار کەوتووە؟ ئەمە دۆڕان و ئیفلاسی نەبێ چیە؟

لێرەدا نامەوێ زیاتر بنوسم، بۆئەوەی بابەتەکە لەوە زیاتر درێژ نەبێتەوە، بە پێویستیشم نەزانی بچمە سەر کۆتا ڕاپۆرتی دارایی هاوپەیمانی بۆ دیموکراسی و دادپەروەری و پرسی دارایی هاوپەیمانی نیشتمانی و باس لە پەیوەندیە نا پەیرەویەکان بکەم.

لە کۆتایشدا داوای لێبوردنم لەوانە هەیە کە نیگەرانن لە زمانی نوسینەکەم، ڕەنگە زمانی نوسین دوای سێ ساڵ بێدەنگی ڕێز لێ نەگیراو هەر بەو جۆرە بێت.



ليست هناك تعليقات

إرسال تعليق

adv/https://www.facebook.com/QaiwanGroup|https://i.postimg.cc/Nfy5msCp/Kurd-Plate-Qg-12-4.gif