لافاوی ئوتێلەکە

ليست هناك تعليقات


پەیكار عوسمان
-
ئینجا ئەوەی کە ئازادی و ژیانی تایبەتی دوو مرۆڤە، هەقی ئەوەیانم نیە، چونکە سەرکوت و "چەپاندن" تەقینەوە دروستئەکا. تەقینەوەیەك لەناو دەروونی ئینسانەکان و تەقینەوەیەکی کۆمەڵایەتیش لە کاتی هاتنە دەرەوەیدا. جا بۆ ئەوەی تەقینەوە ڕوونەداو مرۆڤەکان نەبن بە بۆمبی سێکسیی، گرنگە مەساحەیەك بۆ ئازادی تاکەکان هەبێ و شتەکەش تەنیا بە (تاوان و ناچارکردن و ستەمکردن) ببێتە فەسادو ئا لێرەدا سنوردار بکرێ،، نەكئەوەی سنوردارکردنەکە، لە خودی ئازادی و ئیرادەو کەسایەتی ئینسانەکاندا بکرێت و مرۆڤی تێدا بشکێنرێ!

ئەوەشی کە لەشفرۆشییەکی کۆنترۆڵکراوە، هەقی ئەوەشم نیەو ئەمیش تازە بەشێکە لە سروشتی شار، کە وەکچۆن پەرستگاو یاریگای تێدایە، قومارخانەو مەلهاشی تێدایەو ئەسڵەن ئەگەر ئەو شوێنانە نەبێت، شتەکە لە کۆنترۆڵ دەرئەچێ و دێتە ناو ماڵەکانەوە، وەکو ئەوەی کە لە ئێران هەیە

ئەوەی کە شایەنی باسەو گرنگە قسەی تیابکرێ، ئەو سێکس و لەشفرۆشییەیە، کە لەسەر ناعەدالەتی و ماڵێ گشتی دامەزراوە. بێئەخلاقیی پەیوەندی بە قایش و بەنەخوێنەوە نیە، پەیوەندی بە ستەمکاریی و بەکارهێنانی دەسەڵاتی گشتییەوە هەیە بۆ تێرکردنی حەزی تایبەت. لەشفرۆشەکانی ئێمەش، تەنیا کاسبێکی ناو بازاڕەکەنین، کە کاری خۆیان بکەن و حەقی تۆیان نەبێ و تۆش حەقی ئەوانت نەبێ،، بەڵکو هەژموونیان کردۆتە سەر ژیانی گشتی و لە دائیرەیەکا بەقەت وەزیرێك دەستیان ئەڕوا، نفوزی ئەمنییان هەیە، کۆمپانیاو بزنسیان هەیە، مەکینەیەکی گەورەی ئیعلامیشیان هەیە، کە بەردەوام لەوێوە، وەکو ئەستێرەو کەسانی سەرکەوتوو پیشانی کۆمەڵگا ئەدرێن!

ئەوەی کە لای ئێمە نائاساییە، ئەوەیە کە کۆتوبەندەکانی سەر ژیانی تاك، توندتربووە، بەڵام "مافیاگەریی سێکسیی" گەشەیکردوە. مەسەلەن، لەملاوە سەلەفیەتیك پەرەی سەندوە، کە تەداخولی وردو درشتی ژیانت ئەکاو لەولاوە فەسادێك بڵاوە، کە کچێك بە شەوێك ئەبێ بە ملیۆنێر! کە ئەمە ڕێك پێچەوانەکەی ڕاستە. یەعنی ئەبوو (ژیان بکرێتەوەو فەساد پاشەکشێ بکات) نەك (ژیان داخرێ و فەساد هەڵکشێ)!

کەوانەی یەکەم، سەر بە ئازادی و هۆشیاری و عەدالەتەو کەوانەی دووەم، سەر بە ستەم و جەهل و ناعەدالەتی. ئەوەشی کە لای ئێمە هەیە، ململانێی نێوان ئەو دوو کەوانەیە نیە، کە ململانێ تەندروست و بەرهەمدارەکەی مێژووە،، بەڵکو هەردو تەرەفی سەلەفیزم و سلیکۆنیزم، هەر سەر بە کەوانەی دووەمن! هەر یەکەشیان بووە بە ئایدۆلۆژیایەکی باو و لە میدیاو سۆسیالمیدیاوە، هەیمەنەی خۆی ئاڕاستەی کۆمەڵگا ئەکات!

ئیتر مرۆڤی ئێمەش کەوتۆتە نێوان بەرداشی (فەسادو جەهل) کە هێز لە یەکتری وەرئەگرن و هەردوکیشیان هەر ستەم و "ناچاریی" قووڵئەکەنەوە،، ئەمیان بە هێزی خیتابی دینی و ئەویان بە هێزی پارە. ئازادیش ئەکەوێتە ئەو نێوانەوەو ئەوەیە کە نە جەهل و داخرانەو نە فەسادو بەرەڵایی، بەڵکو ناسینی خۆت و ڕاکێشانی پێ ی خۆتە، بەقەت بەڕەی ویژدان، واتە کرانەوەو ڕۆشتن تا ئەو جێگایەی کە عەدالەتەو ستەم نیە!

خودا چاکەی ڕەهایەو لە وەسفی خۆشیدا ئەڵێ (قائما بالقسط)، کەواتە عەدالەت خوداییترین شتی ئەم وجودەیەو ئیتر یاسا ئاکارییەکەش، ئەوەیە کە مرۆڤ چەنێك عادل بیت و ئەمەش تەنیا ویژدانی خۆت پێتی ئەڵێ، نەك شەریعەت و فیقهو نەریت.. ئەسڵەن زۆرکات عەدالەت و چاکە، لە پێشێلی ئەوانەدایە نەك لە سەروەربوونیان. مەسەلەن ئەوە نەریتی خێڵەکییە کە بڕیاری ژنکوشتنت پێئەدا، خۆ ویژدانی خۆت هەرگیز ئەوەت پێناڵێ! یان زۆرجار فتوایەك، شەڕو تاوانێکت پێئەکا، خۆ ویژدانی خۆت قەت ئەوەت پێ ناکات!

نەك هەر بۆ فەرد، بەڵکو بۆ کۆمەڵگاش، تاکە ڕێگای حوکم، عەدالەتەو ئەمە تەنیا ڕەهەندێکی مادی و بژێوی نیە، بەڵکو لە عەدالەتدا بیرو هۆشیش ئەکرێتەوەو کەسایەتی ئینسان دروستئەبێ و ئازادییەك فەراهەم ئەبێت، کە ئەبێ بە ئیبداع نەك بە فەساد، چونکە ئیتر عەقڵ و ئەخلاقی کەسەکان هەڵکشاوەو مرۆڤەکان تەحقیقی زاتیان کردوە. لێرەدا ئیتر ڕاستگۆیی دروستئەبێ و کوڕێك تەنیا لەگەڵ خۆشەویستەکەیدا پەیوەندی هەیە، نەك ئەوەی گورگێکی برسی بێت بۆ هەموو کچان. لێرەدا ئیتر خۆشەویستییش جوانە، چونکە ڕاستگۆیی دوو ئینسانیی تێدا درەوشاوەتەوە، نەك ئەوەی درۆ و قۆڵبڕین بێت!

بەڵام کاتێ حوکم ئەبێ بە ستەمکاری و عەدالەت غائیبە، ئیتر بۆ کۆنترۆڵکردنی کۆمەڵگا، ئیشت ئەکەوێتە سەلەفیەت و حیکایەتەکانی "بەدیلی عەدالەت". لەم هاوپەیمانێتییەی جەهل و فەسادیشدا، تەحقیقی زات ڕووناداو لەڕێگەی چەپاندنەوە مرۆڤ ئەکرێ بە گورگ و ئازادیش وەکو مەیدانی گورگەکان پیشان ئەدرێ. ئیتر خۆشەویستیش بڤەیە، چونکە خاڵی بەیەكگەیشتنی گورگەکانە. ئیتر بۆ چینی سەرەوە، سێکس فرییەو جیکڵاس ئەبەخشرێتەوە، لەخوارەوەش ئەگەر تۆ گوڵێك بدەی بە خۆشەویستەکەت، حەرامە!

سەیرکە، بەدرێژایی مێژوی ستەمکاریی، ئەوەی کە لە دەرەوەی کۆشكدا حەرامبووە، لە ناو کۆشکدا حەڵاڵبووە، بۆچی؟ چونکە تەنیا "عەدالەت" بەشی هەمووان ئەکات. ناعەدالەتی، چ لە ڕووی مادی و چ لەڕووی ئاسودەیی و دڵنیایی، بەشی هەمووان ناکاو ئەو بۆشاییەش، ئەبێ بە حیکایەتی تر پڕبکرێتەوە. ئا لەوێشدا "هاوپەیمانێتی ڕانەگەیەنراوی" نێوان توجاری سیاسەت و توجاری دین ڕووئەداو هەردوکیان پێکەوە کۆمەڵگا داگیرئەکەن!

خۆ مەبەستم ئەوەنیە کە مەلایەك یان سەلەفییەك، کەسێکی خراپە، ئەسڵەن وەکو خۆی، ئەشێ کەسێکی زۆر پاك و باش بێت، بەڵام کۆی یارییەکە وایەو لە وێنە گەورەکەدا، مەکینەکە خراپ و شەیتانیی ئەسوڕێ. بۆیە تێپەڕاندنی فەساد، لە تێپەڕاندنی عەقڵی دینییەوە دەست پێئەکات. تێپەڕاندنی عەقڵی دینییش، مەبەستم ئاستە دڵی و فەردییەکەی نیە، کە ئازادییەکی تەواو جوان و ڕێزلێگیراوەو ئەو دۆخە ویژدانییەش بەهێزئەکات، کە وتمان بناغەی عەدالەت و فەزیلەتە،، بەڵکو مەبەستم ئاستە گشتی و فیقهییەکەو هەیمەنەکەیەتی بەسەر کۆمەڵگاو هاوپەیمانێتییەکەیەتی لەگەڵ فەساددا.

یەعنی کاتێك لەملاوە، سیاسەت لە مەیدانی خزمەتی گشتییەوە ئەبێتە مەیدانی تێرکردنی حەزە تایبەتەکان،، لەولاشەوە "فیق ه" ئەبێتە بە دیلی "دڵ"و ئیتر تۆ بە قال و قیل ئەڕۆیت نەك بە نورە خوداییەکەی ویژدانی ئینسان،، ئا لێرەدا ئیتر لە هەردولاوە مرۆڤ و کۆمەڵگا تێکشکێنراوە،، سیاسەتی دروست و دینی دروست و کۆمەڵگای دروستیش، ئەوەیە کە ئەم یارییە بوەستێنرێ و پێچەوانە بکرێتەوە!



ليست هناك تعليقات

إرسال تعليق