وه‌زاره‌تی بازرگانی عێراق رایگه‌یاند، به‌شه‌خۆراكی مانگانه‌ی هاوڵاتیانیان زیادكردوه و سه‌رجه‌م ئه‌و مادده خۆراكیانه‌شی له‌ڕێگه‌ی بریكاره‌كانی خۆراكه‌وه دابه‌شده‌كرێن، كوالێتیان به‌رزه و پشكنینان بۆ ده‌كرێت.
ئه‌مڕۆ چوارشه‌ممه 30 حوزه‌یرانی 2021 محه‌مه‌د حه‌نون وته‌بێژی وه‌زاره‌تی بازرگانی عێراق ڕایگه‌یاند ، به‌گوێره‌ی بڕیاری ژماره 160ی ئه‌نجومه‌نی وه‌زیران، بڕیاردراوه به‌زیادكردنی بابه‌ته‌كانی به‌شه‌خۆراكی مانگانه‌ی هاوڵاتیان، له‌وانه‌ش دۆشاوی ته‌ماته، فاسۆلیا، پاقله، نۆك، شه‌كر، ئارد، برنج و ڕۆنی خوارده‌مه‌نی، به‌گشتیش ئه‌و ماددانه‌ی ده‌درێنه هاوڵاتیان بوه‌ته 7 (حه‌وت) مادده.
وته‌بێژی وه‌زاره‌تی بازرگانی عێراق ئاماژه‌ی به‌وه‌ش كرد، "دوای ئه‌وه‌ی له‌چه‌ند ساڵی رابردودا تاڕاده‌یه‌ك به‌شه خۆراكی مانگانه‌ی هاوڵاتیان روی له‌كه‌مبونه‌وه كرد، به‌هۆی ته‌رخان نه‌كردنی بودجه‌ی پێویست، به‌ڵام له‌ئێستادا گرفته‌كان چاره‌سه‌ر كراون و باشترین به‌شه خۆراكی مانگانه دابینده‌كرێت".
محه‌مه‌د حه‌نون باسی له‌وه‌ش كرد، هاوڵاتیان سه‌رسام ده‌بن به‌كوالێتی مادده خۆراكیه‌كان، یه‌كێك له خواردنه‌كانش برنجی به‌سمه‌تی هیندی ڕه‌سه‌نه، هه‌روه‌ها فاسۆلیای ئه‌رجه‌نتینی، دۆشاوی ته‌ماته‌ی توركی و رۆن و شه‌كری بڕازیلی دابینكراون".
وته‌بێژی وه‌زاره‌تی بازرگانی داواش له‌هاوڵاتیانده‌كات، بڕوا به‌و ده‌نگۆیانه نه‌كه‌ن كه باس له‌وه‌ده‌كه‌ن، به‌شه‌خۆراكی مانگانه‌ی هاوڵاتیان كوالێتیان به‌رز نیه، به‌ڵكو سه‌رجه‌میان باشترین خۆراكن و له‌لایه‌ن لیژنه‌كانیشه‌وه پشكنینیان بۆكراوه.
ليست هناك تعليقات
إرسال تعليق