وتەبێژی ئەنجومەنی سەركرایەتی پارتی وەڵامی حاكم شێخ لەتیف دەداتەوە

وتەبێژی ئەنجومەنی سەركردایەتی پارتی لە سلێمانی - هەڵەبجە، لەبابەتێكی وەڵام ئامێزدا دەنوسێت: ئەوەی خاوەن ماڵە دەرگای کراوە دەبێت بۆ کاری چاک، خۆ ئەگەر کەسێک ئەم کارە چاکە ناکات با خراپەش نەکات ئەوە گەورەترین چاکەیە بۆ ئەم نیشتیمانە

فارس نەورۆڵی، وتەبێژی ئەنجومەنی سەركردایەتی پارتی بابەتێك دەكاتە وەڵام بۆ حاكم شێخ لەتیف، كە دوو ڕۆژی ڕابردوو نوسی بووی (دەبوو حیزبەكانی ئۆپۆزسیۆن دەرگا لە نێچیرڤان بارزانی نەكەنەوە)

فارس نەورۆڵی لە درێژەی وەڵامەكەیدا نوسیویەتی: سەرۆک نێچیرڤان بارزانی ئەو سیفەتانەی لە تەک خۆی هەڵگرتووە و لە باوەڕەوە و بە ئەشقەوە لەپێناوی یەکڕیزی کورددا خەبات دەکات. بۆیە دەیەوێ لەڕێگای ئیقناعکردنەوە گفتوگۆیەکی ئەخلاقی و ئەقڵانی بخاتە سەرڕێ.

دەقی نوسینەكەی فارس نەورۆڵی وتەبێژی ئەنجومەنی سەركردایەتی پارتی لە سلێمانی

‎لە کوردەواریدا ئەگەر دوو ماڵ کێشەیان هەبوایە کەسایەتییەک هەوڵی دەدا کێشەکە چارەسەر بکات، دەیان گوت: فڵان کەسایەتی دەرماڵی هەیە، واتە گوێ بۆ کەسانی دیکە دەگرێت، ئەگەر زوڵمیشی لێکرابێت، ئەوا لە بەرامبەرەکەی خۆش دەبوو ،بۆیە پێیان دەگوت دەرماڵی هەیە.

‎ئەگەر ئەم نمونە کۆمەڵایەتییە بەرینە ناوکایەی سیاسییەوە و لەوێ تەوزیفی بکەین، هەمان مانا بە کۆمەڵێک پرنسیپی دیکە جێبەجێ دەکات. ئێستا ناو ماڵی کورد و پەیوەندی نێوان هێزەکان لە دۆخێکی خراپدایە تا ئەو ئاستەی خوانەخواست ئەگەر ڕقت لە نەتەوەیەک بوو، بڵێی بە دەردی کورد بچێت، هەربۆیە لەم کاتەدا پێویستمان بە کەسێکە هێڵێکی واقیعی و مەعقول لەنێوان بیرکردنەوەی مەعقول و نامەعقولدا بکێشێت و هەنگاوی یەکەم لەوێوە دەسپێبکات، کۆمەڵێک گفتوگۆی نەزۆک لەناو هێزە سیاسییەکان و میدیاکاندا هەیە، کۆتایی پێبهێنێت، ئەمەش شکۆمەندییەکی گەورەیە کە فەزای لێکگەشتن بۆ گفتوگۆیەکی بەرهەمداری عەقڵانی، لەپێناوی چاکەی گشتیدا فەراهەمبکات. ئەمەش پێویستی بە کەسایەتییەکە ئیرۆسی سیاسی تێدابێت، واتە ئاشق بێت بە پرسی لێکتێگەیشتن و یەکڕیزیی.

سەرۆک نێچیرڤان بارزانی ئەو سیفەتانەی لە تەک خۆی هەڵگرتووە و لە باوەڕەوە و بە ئەشقەوە لەپێناوی یەکڕیزی کورددا خەبات دەکات. بۆیە دەیەوێ لەڕێگای ئیقناعکردنەوە گفتوگۆیەکی ئەخلاقی و ئەقڵانی بخاتە سەرڕێ. ‎

‎بەدڵنیاییەوە ئەو ڕێگایە پڕە لە دڕک و داڵ و زمانی ئیستیفزازیی، بەڵام سەرکردەی تەحەدیی وەک مەسیح وەڵامی ئیستفزازچییەکان دەداتەوە و فەزایەک دروستدەکات، بۆ خزمەتی کۆمەڵێک پرنسیپ. ئەو کێشانەی لەنێوان هێزەسیاسییەکاندا هەیە هێندە قوڵ نییە چارەسەر نەکرێن بە مەرجێ ئیرادەی چاکەو بیری فراوان هەبێت. دڵنیام هەموو هێزەکان باوەڕییان بەوە هەیە کە سەرۆک نێچیرڤان هیچ غەرەزێکی حزبی لە جوڵەکانیدا نییە، جگە لە چاکەی گشتی. ئەوەشمان لە بیر نەچێت، هەموو ئەم هێزانە ڕەنگدانەوەی کۆمەڵگایە، لە هەموو ڕویەکەوە ئەوەندەش تێگەیشتن و دڵسۆزییان هەیە کە هەمیشە دەرگایان کراوە بێت بۆ بیرکردنەوەی جوان و زمانی باڵای گفتوگۆ، سەرۆک نێچیرڤان بە زمانێکی بەرز و بیرێکی فراوان کاردەکات و دەیەوێ سەرەڕای ڕەخنە توندەکان، کەس هەستی کەس بریندار نەکات. ئەو لە جوڵەکانی خۆی بەردەوام دەبێت، سەرکەوتوو بێت یاخود سەرکەوتوونەبێت پەیامی خۆی گەیاند بە خەڵک و مێژوو.

‎بۆیە وەک کورد دەڵێ ئەوەی خاوەن ماڵە دەرگای کراوە دەبێت بۆ کاری چاک، خۆ ئەگەر کەسێک ئەم کارە چاکە ناکات با خراپەش نەکات ئەوە گەورەترین چاکەیە بۆ ئەم نیشتیمانە.