سەرۆکی پەرلەمانی کوردستان: هێشتا ویست و داخوازییه‌ ڕه‌واكانی گه‌له‌كه‌مان نه‌هاتوونه‌ته‌ دی

ليست هناك تعليقات


 بەبۆنەی تێپەڕبوونی 30 ساڵ بەسەر راپەڕینی ساڵی 1991، سەرۆکی پەرلەمانی کوردستان پەیامێکی بڵاوکردەوە و رایگەیاند "دواجار هه‌ر ئه‌م راپه‌ڕینه‌ مه‌زنه‌ بووه‌ ئیلهامبەخشی درێژه‌پێدانی خه‌باتی گه‌لانی دیكه‌ی عێراق تاوەکو كۆتاییهاتنی یه‌كجاره‌كی بە رژێمی بەعسی داپڵۆسێنه‌ر". ئاماژەی بەوەش کردووە "ده‌ستكه‌وته گەورە‌كانی راپه‌ڕین و گیانبەخشیی پێشمەرگە و قوربانیدانی گەلەکەمان بۆ ئەو ئازادییە خەریکە دەچێتە قۆناخی بێهودەییەوە".

لە بەشێکی پەیامەکەی د. رێواز فایەق، سەرۆکی پەرلەمانی کوردستاندا هاتووە "ئه‌وێ رۆژی خه‌ڵكی راپه‌ڕیوی كوردستان له‌پێناو سەندنی ئازادی و به‌رگریكردن له‌ به‌ها پیرۆزه‌ نه‌ته‌وه‌ییه‌كان و به‌ره‌نگاربوونه‌وه‌ی سیاسه‌تی سڕینه‌وه‌ی نه‌ژادی و به‌عه‌ره‌بكردن و گۆڕینی دیمۆگرافیای كوردستان، به ‌پاڵپشتیی هێزی پێشمه‌رگه‌ی كوردستان، ره‌گ و ریشه‌ی رژێمی به‌عسی خۆسه‌پێنه‌ریان لە کوردستان‌ هه‌ڵته‌كاند".

سەرۆکی پەرلەمانی کوردستان دەڵێت، "کوردستان بە قەیرانێکی دژوار و سەختی سیاسی، ئابووری و کۆمەڵایەتیدا تێدەپەڕێت، لای خەڵکی کوردستان بەهۆی نادادی و نابەرابەری لە شێوازی ژیانی چین و توێژەکانی کۆمەڵگە، رێژەی بێکاری و وەگەڕنەخستنی توانا و پسپۆڕیی هەزاران دەرچووی زانکۆکان، لەسەرخۆی پرۆسەکانی چاکسازی، کێشەی زۆری سێکتەرەکانی خوێندن و تەندروستی و چەندین کێشەی دیکە، ده‌ستكه‌وته گەورە‌كانی راپه‌ڕین و گیانبەخشیی پێشمەرگە و قوربانیدانی گەلەکەمان بۆ ئەو ئازادییە خەریکە دەچێتە قۆناخی بێهودەییەوە".

دەقی پەیامی د. رێواز فایەق، سەرۆکی پەرلەمانی کوردستان:

به‌بۆنه‌ی (30) سیهه‌مین ساڵیادی ڕاپه‌ڕینه‌ مه‌زنه‌كه‌ی گه‌لی كوردستان له‌ 5ی ئازاری 1991، گه‌رمترین پیرۆزبایی خۆمان ئاڕاسته‌ی سه‌رجه‌م كوردستانیانی ئازیزو بنه‌ماڵه‌ی سه‌ربه‌رزی شه‌هیدان و پێشمەرگە قارەمانەکان و چین و توێژو پێكهاته‌ ئاینی و نه‌ته‌وه‌ییه‌ جیاوازه‌كانی كوردستان ده‌كه‌ین، هیواخوازین ئه‌م یاده‌ شكۆداره‌ ببێتە مایەی ده‌ستپێكێكی نوێ له‌خه‌بات و تێكۆشانی گه‌له‌كه‌مان بۆ بنیادنان و بووژانه‌وه‌ی زیاتری كوردستان.

كوردستانیانی ئازیز....

ئه‌وێ ڕۆژی خه‌ڵكی ڕاپه‌ڕیوی كوردستان له‌پێناو سەندنی ئازادی و به‌رگریكردن له‌ به‌ها پیرۆزه‌ نه‌ته‌وه‌ییه‌كان و به‌ره‌نگاربوونه‌وه‌ی سیاسه‌تی سڕینه‌وه‌ی نه‌ژادی و به‌عه‌ره‌بكردن و گۆڕینی دیمۆگرافیای كوردستان، به ‌پاڵپشتیی هێزی پێشمه‌رگه‌ی كوردستان، ڕه‌گ و ڕیشه‌ی ڕژێمی به‌عسی خۆسه‌پێنه‌ریان لە کوردستان‌ هه‌ڵته‌كاند، دواجاریش هه‌ر ئه‌م ڕاپه‌ڕینه‌ مه‌زنه‌ بووه‌ ئیلهامبەخشی درێژه‌پێدانی خه‌باتی گه‌لانی دیكه‌ی عێراق تاكۆتاییهاتنی یه‌كجاره‌كی بەڕژێمی بەعسی داپڵۆسێنه‌ر.

ئێمه‌ له‌كاتێكدا ئه‌م یاده‌ شكۆداره‌ به‌رز ڕاده‌گرین، كه‌هێشتا ویست و داخوازییه‌ ڕه‌واكانی گه‌له‌كه‌مان و ئامانجەکانی ڕاپەڕین به‌ته‌واوه‌تی نه‌هاتوونه‌ته‌ دی، هه‌ر له‌یه‌كلاییكردنه‌وه‌ی چاره‌نووسی ناوچه‌ كوردستانییەکانی دەرەوەی ئیدارەی هەرێم‌ تا ده‌گاته‌ پرسه‌ هه‌ڵواسراوه‌كانی پێشمەرگەو دارایی و بودجه‌و جێبەجێکردنی تەواوی دەستووری ساڵی ۲٠٠٥.

هاوکات ئه‌مڕۆ كوردستان به‌قه‌یرانێكی دژوارو سه‌ختی سیاسی، ئابووری و كۆمه‌ڵایه‌تیدا تێده‌په‌ڕێت، لای خه‌ڵكی كوردستان به‌هۆی نادادی و نابه‌رابه‌ری له‌شێوازی ژیانی چین و توێژه‌كانی كۆمه‌ڵگه‌، ڕێژه‌ی بێكاری و وەگەڕنەخستنی تواناو پسپۆریی هه‌زاران ده‌رچووی زانكۆكان، لەسەرخۆی پرۆسەکانی چاکسازی، کێشەی زۆری سێکتەرەکانی خوێندن و تەندروستی و چەندین کێشەی تر، ده‌ستكه‌وته گەورە‌كانی ڕاپه‌ڕین و گیانبەخشیی پێشمەرگەو قوربانیدانی گەلەکەمان بۆ ئەو ئازادییە خەریکە دەچێتە قۆناغی بێهودەییەوە.

بۆیە لەم یاده‌ پیرۆزه‌دا داواکارم هەموو دامەزراوە دەستوورییەکانی کوردستان، لەڕوانگەی بەرپرسیارێتیی هاوبەش و تەواوکاریمان پێکەوە، كاری لێبڕاوانەو دەستەجەمعی بکەین له‌پێناو بەهێزکردنی متمانه‌ له‌نێوان هاووڵاتییان و دامەزراوەکانداو ھەموو ھەنگاوەکانمان چڕ بکەینەوە بەئاراستەی بەدیهێنانی ویست و داخوازییە ڕەواکانی کوردستانییان لەفەراهەمکردنی ئازادی و سەروەریی یاساو پێشکەشکردنی خزمەتگوزارییە گشتییەکان و دابینکردنی سەقامگیریی دەروونی و سیاسی و ئابووری بۆیان.

له‌كۆتاییدا سه‌ری ڕێزو نه‌وازش بۆ سه‌رجه‌م شه‌هیدانی ڕێگای ڕزگاریی كوردستان داده‌نه‌وێنین، به‌تایبه‌ت شه‌هیدانی 5ی ئازار له‌ده‌روازه‌ی ڕاپه‌ڕین و سه‌رجه‌م شارو شارۆچكه‌كانی كوردستان، هه‌میشه‌ سه‌رفرازبن.

د. ڕێواز فایق
سه‌رۆكی په‌رله‌مانی كوردستان
5ى ئازارى 2021

ليست هناك تعليقات

إرسال تعليق