بەپێی ئامارەکانی دەزگای لووتکە بۆ کاروباری ئاوارە و پەنابەران لە چەند ساڵی رابردوودا "سەدان پەنابەر و ئاوارە" بەهۆی خراپیی بارودۆخی رێگەی قاچاخەوە گیانیان لەدەستداوە. بەڕێوەبەری پرۆژەكان لە دەزگای لووتكە بۆ كاروباری ئاوارە و پەنابەران بە رووداوی راگەیاند "دوو رووداوی زۆر ناخۆش کە هەرگیز بیرمناچنەوە، یەکێکیان ژنێکی هەرێمی کوردستان هاوژینەکەی، دایکی، دوو منداڵی و منداڵێکی دیکەی ناوسکی لەڕێگەی کۆچدا خنکان. هەروەها پیاوێکیش هاوژینەکەی و سێ منداڵی لەنێو ئاودا خنکان و تەنیا خۆی و منداڵێکی مانەوە."
"لە 5 مانگی ساڵی 2020دا زیاتر لە 34 هەزار عێراقی بەرەو ئەوروپا كۆچیان كردووە"
بەپێی ئامارەکانی دەزگای لووتکە بۆ کاروباری ئاوارە و پەنابەران لە پێنج مانگی ساڵی 2020دا زیاتر لە 34 هەزار عێراقی بەرەو ئەوروپا كۆچیان كردووە، بەپێی گوتەی بەرپرسی رێكخراوێكی تایبەت بە كۆچ بەشی زۆری ئەو كۆچبەرانە خەڵكی هەرێمی كوردستانن.
لە بەرنامەی بەکاتی سلێمانی رادیۆی رووداو کە ئاسۆ سەراوی پێشکەشی دەکات لەگەڵ میوانەکانی باسی کۆچکردنی خەڵکی هەرێمی کوردستان و عێراقیان بۆ دەرەوەی وڵات کرد.
بۆتان شارباژێڕی، بەڕێوەبەری پرۆژەكان لە دەزگای لووتكە بۆ كاروباری ئاوارە و پەنابەران، رایگەیاند ئەو ژمارەیە لەكاتێكدایە لە 12 مانگی ساڵی 2019دا زیاتر لە 53 هەزار عێراقی بەرەو ئەوروپا كۆچیان كردووە.
بۆتان شارباژێڕی، بەڕێوەبەری پرۆژەكان لە دەزگای لووتكە بۆ كاروباری ئاوارە و پەنابەران لە بەرنامەی بەکاتی سلێمانی بە رووداوی راگەیاند "لە ساڵی 2019دا 53 هەزار و 240 کەس تۆمارکراون، بەڵام لە 2020دا 34 هەزار کەس لە پێنج مانگدا تۆمارکراون. بۆیە هاتنی داعش و قەیرانی ئابووری و دارایی لە عێراق و هەرێمی کوردستان کاریگەریی گەورەی هەبووە لەسەر کۆچی خەڵک بۆ دەرەوە."
"ژمارەی کۆچکردن بۆ ئەوروپا بەرەو مەترسی دەڕوات"
بەڕێوەبەری پرۆژەكان لە دەزگای لووتكە بۆ كاروباری ئاوارە و پەنابەران ئاماژە بەوە دەدات، کە ژمارەی کۆچکردن بۆ ئەوروپا بەرەو مەترسی دەڕوات، هۆکارەکەش کەمبوونەوەی دەستی کار، تێکچوونی باڵانسی جێندەری، کەمبوونەوەی گەنج و چەندین هۆکاری دیکەش هەن. دەشڵێت "ئەو کۆچبەرانەی داوای مافی پەنابەریێتی دەکەن و کەیسەکەیان سیاسییە، ئاماژەیان پێناکرێت و تۆمارناکرێن."
لە بەشێکی دیکەی قسەکانیدا بۆتان شارباژێڕی باسی شێوازی کۆچکردنی یاسایی و نایاسایی کرد و رایگەیاند "ئەگەر گەنجێک لە هەرێمی کوردستانەوە لە رێگەی کۆنسوڵخانەکانەوە بچێتە وڵاتێک و دواتر داوای مافی پەنابەرێتی بکات و ئەوە شێوازێکی یاساییە، بەڵام نایاساییەکان هەموو ئەو رێگەیانەن کە پێیدەگوترێت قاچاخ و مەترسیدار و نایاسایین."
" هاوژینەکەی و سێ منداڵی لەنێو دەریادا خنکان"
بۆتان شارباژێڕی، باسی چیرۆکی یەکێک لەو کەسانەی کرد کە بەڕێگەی مەترسیدار دا رۆیشتوون و گوتی: نموونەی کۆچی ناخۆش زۆر زۆرن، بەڵام دوو حاڵەت هەن کە هەرگیز بیرم ناچنەوە. "یەکێک لەو کەسانە ناوی زانایە رووداوێکی بەسەرهات کە خۆی و خێزانی و سێ منداڵی بەرەو ئەوروپا رۆیشتن، خێزانەکەی حەملی هەبوو، بەڵام بەداخەوە لە دوای ئەوەی کە یەختەکەیان لەنێوان تورکیا و یۆنان نوقمبوو تەنیا خۆی و کوڕێکی دەرچوون و سەرجەمیان خنکان."
زانا کە ئێستا وەک خۆبەخش لە دەزگای لووتکە کاردەکات، چیرۆکی خۆی بۆ بۆتان گێڕاوەتەوە و گوتویەتی "من بیرم لەوە کردووەتەوە کە ژیانێکی باش بۆ منداڵەکانم دابین بکەم، بەڵام نەمزانی کە لەنێو دەریادا دەخنکێن.
ليست هناك تعليقات
إرسال تعليق