ئامانجەکانی کۆبونەوەی تورکیا و عێراق

فارس نەورۆڵی

هەرکات چوار دەوڵەتی دەوروبەر تورکیا، عێراق، ئێران، سوریا کۆدەبنەوە هەمیشە یەکێک لە تەوەری گفتوگۆی نێوانیان کێشەی کوردە، بۆیە هەرکات کۆبوونەوە چوار قۆڵییەکان یان دووقۆڵییەکانی ئەو وڵاتانە ئەنجام دەدرێ، ترسێک لای نوخبەی سیاسی وڕۆشنبیری کوردی دروست دەکات. سەردانی کازمی بۆ تورکیا و باشتر بوونی پەیوەندییەکانی عێراق و تورکیا، بەشێکی لەسەر پەراوێزخستنی کورد دەبێت.

ئێستا تورکیا و عێراق گفتوگۆ لەسەر سێ تەوەر دەکەن ئەوانەش ( ئاسایش، ئاو، ئابوری ) ئەگەرچی جاران هەر کۆبوونەوەیەک لە نێوان ئەو دەوڵەتانە بکرایە سەرنج و ترس و خەیاڵی کورد لای پرسی ئاسایش بوو لە نێوان ئەو دەوڵەتانەدا، بەڵام ئێستا هەرسێ پرسەکە جيگای ترسن، چونکە ئێمە لە قۆناغی حکومەت داریداین بۆیە ئەو پرسانە ڕاستەوخۆ کاریگەری لەسەر هەرێمی کوردستان هەیە. جیۆپۆلەتیکی هەرێمی کوردستانیش یەکێکە لە لاوازییەکانی ئێمە، ئەوەی بۆ کورد پێویستە کۆکردنەوەی زاکیرەی سیاسی کوردییە بۆ کارکردن لەسەر ئەو پرسانە وکۆی گۆڕانکارییەکانی ناوچەکە. ئەمەش دەبێت حزبەکان سیاسەت لە فەیسبوک وەرگرنەوە و بیدەنە دەست ئەقڵ بۆ ئەوەی بتوانن کۆدەنگییەک بۆ ئەم قۆناغە دروستبکەن.

لە هەمانکاتدا ئەرکێکی مێژووی و ئەخلاقی هێزە سیاسی و کۆمەڵایەتییەنی پارچەکانی دیکەی کوردستانە. پشتیوانی حکومەتی هەرێم و پرۆسەی سیاسی هەرێم بکەن و گێچەڵی بۆ دروستنەکەن، چونکە هێزی هەرێمی کوردستان دواجار ئومێد و هێزی هەموو کوردە. باوەڕیشم وایە بەڕێز سەرۆکی هەرێمی کوردستان بە جیهانبینییە دیبلۆماسیەکەی خۆی بتوانێ ئەو هاوسەنگییانە لەسەر ئاستی ناوچەکەوناوخۆ ڕابگرێت و مەترسییەکان لەتەک کۆی حزبەکاندا گفتوگۆ بکات، بۆئەوەی هەمولایەک تواناکانیان بخەنە گەڕتابتوانن ماڵی کورد لەم پەرتەوازەییە دەربازبکەن و پێویستە حزبەکانیش هاوکاری و پشتیوانی تەواوی بکەن.

ئەوکات لێرەوە دەتوانین لە مەترسی ئەو کۆبوونەوانەی نێوان دەوڵەتانی ناوچەکە ڕزگارمان ببێت، یاخود نەهێڵین کاریگەری زۆر خراپی لەسەرمان هەبێت. خەڵکیش ئەم چاوەڕوانییەیان لە سەرۆکی هەرێمی کوردستان هەیە، کە جوڵەکانی خێراتر بکات بە هەردوو ئاڕاستەی ناوخۆ و دەرەوەدا.