ئەمشەو گەشتە ئاسمانیەكان دەستپێدەكەنەوە

 

بەڕێوەبەری فڕۆکەخانەی نێودەوڵەتیی هەولێر راگەیاند، ئەمشەو پێنجشەممە گەشتە ئاسمانییەکانی نێوان هەولێر و تورکیا دەستپێدەکەنەوە.

ئەحمەد هۆشیار، بەڕێوەبەری گشتیی فڕۆکەخانەی نێودەوڵەتیی هەولێر بە ت راگەیاند "ئەمشەو کاژێر 2:00ی شەو لە پێشوازیی هێڵی پێگاسۆسی تورکی دەبین، کە گەشتەکە لە ئیستەنبووڵەوە بۆ هەولێر دەبێت. گەشتی فڕۆکەکە لە فڕۆکەخانەی سەبیحە گۆکچەنەوە دەستپێدەکات و سەرنشینەکان لە فڕۆکەخانەی نێودەوڵەتیی هەولێر دادەبەزن. بە پێچەوانەشەوە، گەشتیاران لە هەرێمی کوردستانەوە بۆ ئیستەنبووڵ دەبات".

بەپێی ماڵپەڕی پێگاسۆس، ئەمشەو گەشتێک هەیە لە ئیستانبووڵەوە کە کاژێر 11:25 خولەکی شەو دەست بە گەشتەکە دەکات و کاژێر 02:00ی بەرەبەیان فڕۆکەکە دەگاتە هەولێر.

بەڕێوەبەری گشتیی فڕۆکەخانەی نێودەوڵەتیی هەولێر ئاماژەی بەوەش کرد "رۆژی شەممە 26ی ئەیلوولی 2020 کاژێر 4:30ی شەو تورکیش ئێرلاین گەشتی ئیستەنبووڵ - هەولێر و هەولێر - ئیستەنبووڵ ئەنجامدەدات".

گەشتی نێوان هەموو هێڵە ئاسمانییەکان و فڕۆکەخانەی هەولێر، بە گوتەی ئەحمەد هۆشیار "بەمزووانە دەستپێدەکەنەوە، تەنها رۆیاڵ جۆردن و لۆستانزە نەبێت. رۆیال جۆردن ئوردنییە و لۆستانزەیش لەنێوان ئەڵمانیا - هەولێرە. پێشبینی دەکرێت مانگی 10 رۆیاڵ جۆردن دەستپێبکاتەوە. چاوەڕوان دەکەین لۆستانزەش کار بۆ دەستپێکردنەوەکە بکات".

ئەوەش لەکاتێکدایە، تاهیر عەبدوڵڵا، بەڕێوەبەری فڕۆکەخانەی سلێمانی راگەیاند، گەشتەکانی فڕۆکەخانەکە لەگەڵ تورکیا تاوەکو ئێستا دەستیان پێنەکردووەتەوە و "ئەمشەو گەشتی ئاسمانی لەنێوان ئیستەنبووڵ و سلێمانی ئەنجامنادرێت".

پێشتر سەرۆكی یەكێتیی كۆمپانیاكانی فڕۆكەوانی ‌و گەشتیاری لە هەرێمی ‏كوردستان رایگەیاند، گەشتە ئاسمانییەكانی نێوان توركیا ‌و عێراق بە ‏سنوورداری دەستیپێكردووەتەوە‌، گوتیشی "پێشتر توركیا‌ و عێراق هەفتانە ‏‏284 گەشتی ئاسمانی لەنێوانیاندا دەكرا، بەڵام ئێستا مۆڵەتی 40 ‏گەشت دراوە".‏

لاوەند مەموندی، سەرۆكی یەكێتیی كۆمپانیاكانی فڕۆكەوانی ‌و گەشتیاری ‏لە هەرێمی كوردستان ڕایگەیاند، ‏بەراورد بە پێش ڤایرۆسی كۆرۆنا گەشتەكان زۆر كەمبوونەتەوە ‏‏"پێش بڵاوبوونەوە ڤایرۆسی كۆرۆنا هەفتانە 142 گەشت لە توركیا‌وە‌ و 142 گەشتیش لە ‏عێراقەوە دەكران، بەڵام ئێستا رێگەدراوە بە هەردوو وڵاتەكە هەفتانە ‏‏40 گەشت بكەن، واتە 20 بە 20، ئەوەش دەبێتە هۆی كەمبوونەوەی ‏گەشتیار".‏

سەرۆكی یەكێتیی كۆمپانیاكانی فڕۆكەوانی ‌و گەشتیاری لە هەرێمی ‏كوردستان ئەوەشی خستەڕوو، پێش بڵاوبوونەوەی كۆرۆنا وەرگرتنی ‏ڤیزەی توركیا ئاسان بوو، بە ئەلیكترۆنی وەردەگیرا، بەڵام ئێستا زۆر ‏قورس بووە و تەنیا لە رێگەی سەردانیكردنی كۆنسوڵخانەكانەوە ‏دەبێت.

بەهۆی بڵاوبوونەوەی ڤایرۆسی كۆرۆنا چەندین مانگە گەشتە ‏ئاسمانییەكانی نێوان توركیا ‌و عێراق راگیراون.