ئەمڕۆ هەینی محەممەد جەواد زەریف، وەزیری دەرەوەی ئێران بە سەردانێک گەیشتە لوبنان و بڕیارە لەگەڵ هاوتاکەی لە حکومەتی کاربەڕێکەری ئەو وڵاتە کۆببێتەوە.
لە راگەیێندراوێکیدا، وەزارەتی دەرەوەی ئێران ئاشکرایکرد، رۆژی هەینی 14ی ئەم مانگە، محەممەد جەواد زەریف بە سەردانێک گەیشتووەتە لوبنان و لەگەڵ شەربل وەهبە، وەزیری دەرەوە لە حکومەتی کاربەڕێکەری ئەو وڵاتە و هەروەها گەورە بەرپرسانی وڵاتەکە کۆدەبێتەوە.
راشیگەیاند: سەردانەکەی جەواد زەریف تایبەت دەبێت بە تاوتوێکردنی دوایین پێشهاتەکانی پەیوەست بە تەقینەوەکەی بەندەری بەیرووت و چۆنیەتی پێشکەشکردنی هاوکارییەکان بە لوبنان و هەروەها خستنەڕووی خاڵە هاوبەشەکانی نێوان هەردوولا.
محەممەد جەواد زەریف یەکەمین بەرپرسی ئێرانە و هەروەها یەکێکە لە بەرپرسە بیانییە کەمەکانە کە سەردانی لوبنان دەکات.
سەردانەکەی جەواد زەریف لەکاتێکدا دێت خۆپیشاندانەکانی لوبنان دژ بە دەسەڵاتی سیاسی بەردەوامن و بەشی زۆریان داوای هەڵوەشاندنەوەی هەموو دامەزراوە حکومییەکان دەکەن.
هاوکات بەشێک لە لوبنانییەکان حیزبوڵڵای لوبنان بە بەرپرس لە تەقینەوەکەی بەندەری بەیرووت دەزانن و داوای سزادانی گەورە بەرپرسانی حیزبەکە دەکەن.
تەقینەوەکەی بەیرووت کە رۆژی 4ی ئەم مانگە لە بەندەری بەیرووت بەهۆی گڕگرتنی کۆگایەکی نیتراتی ئەمۆنیۆم روویدا، کوژرانی 171 کەس و برینداربوونی نزیکەی شەش هەزار کەسی لێکەوتەوە.
ليست هناك تعليقات
إرسال تعليق