سێ قسە و سێ بابەتی گەرم و گرنگ

هاوکار عزەت

-

یەکەم : هەرکەس و هەر لایەنێك ( یەکێتی بێت یان پارتی) پەرلەمان کارا بکاتەوە، ئەرکی پەرلەمانتارانی حزبەکانی ترە بچنە هۆڵی پەرلەمان و بە واجبی شەرعی و یاسایی خۆیان هەستن، نابێت لە ترسی ئەوەی بکەونە بەر خەشمی حزبەکەی تر واز لەو ئەرکەی خۆیان بهێنن، پەرلەمانتار هیچ ئەرکێکی تری لەسەر نییە لە کۆمەڵگەدا جگە لە ئەرکە پەرلەمانییەکەی، وا ١٨ مانگە ئەو ئەرکە جێبەجێ نەکراوە، هەرکەس باسی پرۆسەی دیموکراسی بکات و ئامادە نەبێت بچێتە دانیشتنی پەرلەمانەوە بە بیانوی راگرتنی باڵاسی سیاسی، دەبێت گومانی لە بیر و فکری خۆی هەبێت بۆ پرۆسەی سیاسی، ناکرێت بەبیانوی ڕێگری لە قەیران و تێچکچونی دۆخەکە ، هەندێک حزب و پەرلەمانتار نەچنە دانیشتنی پەرلەمان، دۆخی هەرێم هیچکات لە ئێستا خراپتر نابێت و قەیران لەمە گەورەتر نابێت، ئیتر واز لە دەستەواژەی سواو بهێنن.

دووەم: ونونی چەکەکانی مستەر ترەمپ، دۆناڵد ترەمپ بە هۆکار و بێ هۆکار هەرکات بیەوێت کورد تۆمەتبار دەکات بەوەی چەکی ناردوە و کورد گلیداوەتەوە و دیار نەماوە، بانکی ناوەندی ئەمریکا کۆنتڕۆڵی هەموو ئەو سەد دۆلاریانەی لایە کە لە رۆژهەڵاتی ناوەراست و تەواوی جیهانن، دەزانێت کام سەد دۆلارییە و کام ژمارەیە لە گیرفانی کامماندایە و لە چ وڵاتێکدایە و کەی ویستی بلۆکی دەکات و مامەڵەکردنی پێوە ڕادەگرێت، ساڵانە سزای ژمارەیەکی زۆری بانک و کۆمپانیا و حزب دەدات بە هۆکاری ئەوەی دۆلاریان بە نایاسایی ناردوە بۆ ئەو وڵاتانەی لەژێر سزای ئەمریکادان، دەزانێت کام دۆلارە بڕیارە لە عێراق بێت و ئێستا لە ئێران مامەڵەی پێوە دەکرێت، ئەی خێرە نەزانێت ئەم چەکانە لای کێن و چۆن دیار نەماون؟ پێم وایە ترەمپ دەیەوێت شتێکی تر بە دەست بهێنێت و کوردیش خۆی لێکردوە بە کەڕەی شەربەت، تەبعەن کە دەڵێین کورد مەبەستمان کاربەدەستیانی کوردە، پێویستە هەڵوێستی جدییان هەبێت چونکە ئێستا لە دیدی چیهان بە گشتی و ئەمریکیەکان بە تایبەتی، ئێمەی کورد گەلێکی ( دز) ین.

سێیەم : لەبارەی چوار ڕاوێژکارەکەی ئەنجومەنی شوراوە، ئەو چوار راوێژکارە بە نایاسایی و گەندەڵییەکی بێ چەند و چوون دامەزراون، ماوەی ١٢ ساڵە دەیان هەزار دەرچوی زانکۆ و پەیمانگاکان و یەکەمەکان لە چاوەڕوانی دامەزراندندان، کەچی پارتی بە یەک قەڵەم چوار کەس بە پلە و ئیمتیازی باڵا دادەمەزرێنێت، ئێ ئەمە کارێکی نایاسایی ڕوونە، یەکێتیش کە جێگری وەزیری داد و جێگری سەرۆکی ئەنجومەنی شوراشی لایە، ناکرێت بێ ئاگابێت لەم دامەزراندنە، خۆ ئەگەر بێ ئاگادابێت لەوە خراپترە کە ئاگادار بوبێت. راوێژکارەکانیش هیچ دەسەڵات و مافێکیان لە دەنگدان لەسەر هیچ بابەتێکی یاسایی و کارگێریی نییە و تەنها راوێژکارن نەک ئەندامی ئەنجومەن.