وەزارەتی دەرەوەی بەریتانیا لە راگەیێندراوێکدا لەبارەی تۆپبارانە خوێناوییەکەی زاخۆ دەڵێت: "شانشینی یەکگرتوو بە جیدی نیگەرانە لە هەواڵی کوژران و برینداربوونی خەڵکی سڤیل لە ئەنجامی هێرشێک لە قەزای زاخۆی سەر بە دهۆک لە 20ـی تەممووز."
وەزارەتی دەرەوەی بەریتانیا هەروەها "ئەوپەڕی هاوخەمیی" خۆی بۆ بەرکەوتووانی هێرشەکە دەردەبڕێت و دەڵێت، ئامادەن لە لێکۆڵینەوەکاندا، یارمەتیی حکومەتی عێراق بدەن.
وەزارەتی دەرەوەی بەریتانیا دەشڵێت، "شانشینی یەکگرتوو سەرکۆنەی زیانە گیانییەکە دەکات و بەردەوام دەبێت لە پاڵپشتیکردنی سەقامگیری عێراق، بە هەرێمی کوردستانی عێراقیشەوە."
رۆژی چوارشەممە، لە ئەنجامی تۆپباران بۆ سەر گوندی پەرەخ لە زاخۆ، لانیکەم 9 کەس کوژران و 26ی دیکەش برینداربوون، ئەوە بە گوێرەی بەرپرسانی تەندروستیی قەزاکە.
لەسەر فەرمانی مستەفا کازمی، سەرۆکوەزیرانی عێراق و بە سەرۆکایەتیی فوئاد حوسێن، وەزیری دەرەوە، شاندێکی ئەمنیی سەردانی شوێنی رووداوەکەی کرد و جەختی لەوە کردەوە کە هێرشەکە لە لایەن تورکیاوە کراوە.
هێرشە خوێناوییەکە کاردانەوەی تووندی لایەنە سیاسییەکان و شەقامی عێراقی لە دژی ئەنقەرە بەدوای خۆیدا هێنا. بەڵام وەزارەتی دەرەوەی تورکیا لە راگەیێندراوێکدا بەرپرسیاریێتیی خۆی لە هێرشەکە رەتکردەوە و گوتی: "تورکیا ئامادەی هەموو هەنگاوێکە تاوەکو راستییەکان ئاشکرا دەکرێن."
ليست هناك تعليقات
إرسال تعليق