هەورامی چی قارەمانش نیا؟

ليست هناك تعليقات


ئاراس ڕەفیق محمد
-
بەشـــــو(1)
وەختێ باسو قارەمانی کەرمێ جەڕووە سیاسی و سەروازیەکەیشۆ پەیش مدیەیمێ، مەبەستمانە واچمێ قارەمان ئاکەسەنە هەکە دلێ میلەتەکا تەرو کوردینە هورکەوتەن، ڕەگو ڕیشێوە خێڵەکیانە پەشتیش گێرۆ، دلێ زەمینێوە عەشایەری سەرو بنەماو زاڵبیەی پەیدابۆنە و هێزێوە سەروازی وێ نەویست پەشتیش گێرۆ گۆش پانەی مەدۆ ئی کەسە هەقەتیناو ئینا سەرو ڕێوە حەقێ بەڵکو سەرو ئابنەمێ هەرمانەکەرۆ هەکە زاڵبۆ ملو ئەویشای تەریرە، ئەویتەر هەرکەسێوە یان هەرگروپێوەن بەدژمن و وێش مزانۆش.

کەسی قارەمان ڕەگو ڕیشێوە دەرەبەگی و ئەغەواتیش هەن و هەمیشە کۆمەڵێ سیفەتێش چەنە بەرگنا نیشانێنێ پەی گەورەیی دلێ عەشرەت و خێڵەکەیشنە، پێسە سەخاوەتی و مێماننەوازیش، و ساحیب دیوەخان و بوێرین.

ئانێچ هەکە ئینێ دەورشنە نانەوەرێ ئاکەسیەنێ و داواکاریەکاشا جەڕاو ئا هێزە زاڵەو قارەمانەکەیۆ بەگا مارا. وەرانوەریچنە وێشا مدا کوشتەی جەڕاو فەرمانەکاو قارەمانەکەینە، چێگەوە پێناسە و ناسنامەو پیایی شێوەگێرۆ و پیایی ئانەنە هەکە دلێ عەشرەتەکەینە وێنەش کیشیان.

ئێمە ئەگەر تەماشەو دەگایەکاو شارەزووری و گەرمیانی کەرمێ فرەو دەگایەکانە ئاقارەمانشە چەنە هورکەوتەن و جەڕاو ئاییوە دلێ ئەحزابی سیاسیچنە یاگێ وێش کەردێنەشۆ و داواکاریەکاو خەڵک و خێڵەکەو وێش جابەجا کەرۆ، تەنانەت ئەگەر کێشەی کۆمەڵایەتیچشا بۆ ئا پلەو یاگێ وێشە وزۆ خزمەت و خێڵەکەیش و دەسو خەڵکی ماچ کەرۆ پەی وەشکەردەی ونێ و حەلکەردەی کێشەکاشا.

وەلێ وەختێ مەیمێوە دلێ هەورامی چی یاگێنە کۆڵاو نەتاوانش پاشێوە هەکە دلێ غەیرو هەورامیەکانە هەن قارەمانش چەنە پەیدابۆ، ئینەیچ گێڵۆوە پەی ئاجیاوازیە بنەڕەتیا هەکە دلێ هەورامیەکانە هەن و دلێ ئەویشا تەرینە مەوینیۆ، هەوڕامیەکێ وەختێ ئەرەنیشتێبا و دەگا دروسکەڕا خێڵ و عەشیرەت پێیسە عورفی ورمەگێراو ئا دەسورە دلێ خێڵێوە شارەزوورینە یان دلێ خێڵێوە گەرمیانینە هەن چێگە مەوینیۆ، وەختێ یۆ جەهەورامیەکایچ یان بنەماڵێوە جەهەورامیەکایچ مەیلشا پەی ئی جۆرە جە عەسەبەی بۆ مەتاوۆ دلێ هەورامانینە گەشەکەرۆ یان زوو پوکیۆوە و وازش چەنە مارۆ یان جەدەسورە هەورامیەکەی ورگێڵۆوەو ملۆ پاڵو هێزێوە غەیرە هەورامینە خزمەتکەرۆ و چاگە زەمینەو گەشەکەردەی ئا مەیل و زاڵبیەییشە پەی پەیدابۆ و وردەوردە بەرگنۆ، وەلێ نە هەورامیەکێ پەشتیش گێرا نە ئاییچ خزمەتوو هەورامی و هەورامانیش پەنە کریۆ، چێگەوە تەنیا خزمەت و وێش و ئاشۆنێ تاوۆ کەرۆ هەکە ڕاشا کەردەنۆ دلێشنە بەدەسورێوە خێڵەکیانە گەورەبۆ.

گەورەبیەی هەورامیەکەی وابەسەو ئادەسورینە هەکە دلێ گروپە غەیرە هەورامیەکەینە هەن، بەمانێوەتەرە ئی کەسە جەهەورامیبیەی گنۆو بۆ بەچێوێوە تەر بێجگە جەهەورامی، هەروەختێوەیچ ئاگروپو خێڵە هەکە قارەمانە دروسکریاهەورامیەکەش چەنەن دەسش چەنەورگێراو بەکەسێوە غەیرە تەماشەش کەرا ئیتر هەورامیەکە قارەمانیەکەش مەمەنۆ و بۆوە بەکەسێوە ڕووتەڵەو ئاسایی، بەمانێوەتەرە قارەمانیەکە جبەرۆ دریانش پەنە، گردو مەسڵەحەتەکاش جەدەس مدۆ و مێوە دیسان گلەیێ جە هەورامی کەرۆ، هەورامیەکێچ گەرەکشا نیاو پەشتیش مەگێرا ماچا چێشش پەی هەورامانی کەردەن تا ئێمە پەشتیش گێرمێ، جە عەسڵیچنە هەردووی ڕاسمەواچا، مەزانا کێشەکەشا ئیناچکۆوە.

دکتۆر حەمەمین هەورامانی بەڕەحمەتبۆ، دلێ یۆ جەکتێبەکاشنە باسو هەورامی کەرۆ ماچۆ هەورامی عادەتو ژمارە (سفر)یش هەن بلۆ پاڵو حەر ژمارێوەتەری دەقات زیادش کەرۆ بەبێ ئانەی وێش نامێشبریۆ، ماچۆ ئەگەر بلۆ پاڵو ژمارەحەوتی کەرۆش حەفتا و کاتو وانایۆ ژمارەکەینە تەنیا حەوتەکەبەرگنۆو بۆ بەحەفتاسفرەکەیچ مەونیۆوە و دلێ زوانینە مەوچیۆ جەوەختێنە سفرەکەیچا حەوتەکەش زل کەردەن.


ليست هناك تعليقات

إرسال تعليق

adv/https://www.facebook.com/QaiwanGroup|https://i.postimg.cc/Nfy5msCp/Kurd-Plate-Qg-12-4.gif