عێراق و کوردستان دوو هەفتەی سەختیان بەڕێکرد!

ليست هناك تعليقات


عادل باخەوان
-
لە نێوان ٢٦ ی پێنج و ٥ی شەش دا، عێراق دوو هەفتەی سەختی بەڕێکرد، دوو هەفتە کە چەندین ئەکتەر لە تاقیکردنەوەی سەختدابوون و ڕوداوەکانی ئەو دوو هەفتەیە بەدڵنیاییەوە دەستکاری گرنگی سروشتی پەیوەندیەکانیان کرد و هەوڵدەدەم لەم خاڵانەی خوارەوەدا بە کورتی و بەناڕاستەوخۆ ئاماژە بە هەندێکیان بدەم.

1. سەرلەبەیانی ڕۆژی چوارشەمەی ٢٦ی پێنج، هێزێکی تایبەتی عێراقی، بە فەرمانی ڕاستەوخۆی بەڕێز کازمی، لە ناوچەی دورە، باشوری ڕۆژوئاوای پایتەخت، پەلاماری قاسم موسلیح دەدەن و دەیگرن. قاسم بەرپرسی ئۆپراسیۆنەکانی ئەنبار و بەرپرسی دەروازەی بوکەمالە کە عێراق بە سوریای ئەسەدەوە دەبەستێتەوە. قاسم یەکێکە لەو کەسایەتیە هەرە گرنگانەی کە سوپای پاسداران گرەوی لەسەر دەکات.

2. چەند کاتژمێرێک دواتر شەش هەزار چەکداری حەشدی شەعبی بەسەرکردایەتی ئەبو فەدەک، پەلاماری ناوچەی سەوزدەدەن و تەواوی دەزگاکانی دەوڵەت گەمارۆدەدەن و لەژێر فشارێکی چڕدا، بەڕێز سەرۆک وەزیران ناچاردەکەن کە قاسم ڕادەستی فالح فەیاز بکات، هەڕچەند خودی پی ئێم تائێستاش ئەم هەواڵە ڕەددەکاتەوە، بەڵام ڕاستیەکەی ئەوەیە کە قاسم لای فالحە، نەک لە هیچ شوێنێکی تر.

3. بەپێی هەموو ئاماژەکان بەڕێز کازمی وەک پێویست هەڵسەنگاندنی بۆ ئەم بڕیارەی نەکردوە و کارایی ئەو نوخبە ڕۆژنامەنوس و ڕۆشنبیرەی بەسەرەوەیە کە زیاتر لەژێر کاریگەری سۆز و هەستدا بڕیاردەدەن تا عەقڵ و بەهەندوەرگرتنی پەیوەندیەکانی هێز.

4. لە چرکەساتی قاسم موسلیحدا پرسی متمانە لەنێوان بەڕێز کازمی و چەند هاوپەیمانێکدا کاڵبوەوە، چونکە کازمی بەهیچ شێوەیەک نە پرسی پێکردبوون نە ئاگاداریشی کردبونەوە.

5. یەکێک لەوانە موقتەدا سەدر کە لە میدیاکانەوە هەواڵەکەی بیستبوو. هەر ئەمەش وایکرد کە هەڵوێستی سەدر لەسەر ئەو ڕوداوە، تەواوی دەوربەری سەرۆک وەزیران توشی شۆک بکات، تا ئەو ڕادەیەی هەستبەوەبکەن، وەک یەکێک لە هەرە نزیکەکانی جەنابی کازمی پێیگوتم، وەک حوسەین لە دەشتی کەربەلادا بەتەنها جێی هێشتون !

6. هەروەها کارایی دانا بەسەر پەیوەندی نێوان حکومەتی هەرێمی کوردستان و کازمیشەوە، چونکە هەرێمیش هەر تەنها لە میدیاکانەوە هەواڵەکەی بیست و هیچ جۆرە ڕاوێژکردنێکی لەگەڵ هەرێمدا نەکردوە. هەرێمیش کە لەیەککاتدا دەبێ پەیوەندیەکانی لەگەڵ ئیران و حەشدی شەعبی و سەدر و مەرجەعیەتدا بە هەند وەربگرێت، هیچ هەڵوێستێکی نە بە سەلبی و نەبە ئیجابی لەسەر ئەو ڕوداوە دەرنەبڕی. ئەمەش بەشێکی زۆری لە دوەربەری هەرە نزیکی بەڕێز کازمی توشی شۆک کرد.

7. من پێموایە هەموو ئەو تێزانەی کە پێیان وایە حەشد بریتیە لە چرکەساتی نادەوڵەت، چرکەساتی دەوڵەتی قوڵ، دەستی سێهەم، .....، تەواو دروستنین. لە عێراقدا حەشد خودی دەوڵەتە، حەشدی دەوڵەتە، حەشد هەموو سەرچاوەکانی دەوڵەتی لەبەردەستدایە و بەبێ حەشد هیچ خوێندنەوەیەکی دەوڵەت لە عێراقی ئێستادا درستدەرناچێت.

8. بێگومان ئەمە مانای ئەوەنیە کە حەشد یەکەیەکی گونجاو و هاوئایدۆلۆژیا و هاوستراتیژ و یەک ڕەنگ و یەک دەنگە. هەروەها مانای ئەوەنیە کە ئەکتەری دیکە لە عێراقدا نیە و مەیدانەکە تەواو یەکلاییبوەتەوە بۆ حەشد. بەپێچەوانەوە، چەندین ئەکتەری جیاواز لە ئارادان و لە چرکەساتی بەریەککەوتندان، بەڵام لەهەمویان بەهێزتر و کاراتر حەشدە و بێ هیچ دودڵیەک ئەبوفەدەک لە جومعە عناد بەهێزترە.

9. هەروەها لە هەرێمیش پەیوەندیەکانی نێوان پەکەکە و کەی ئار جی و تورکیا گرژەیەکی توند بەخۆیەوە دەبینێت و پێنج پێشمەرگە شەهید دەبن و کەمپی مەخموریش بەدرۆن بۆردوماندەکرێت. پرسیاری سەرەکی ئەوەیە کە لەڕابوردودا دوو پۆل بەرامبەر یەک لە عێراقدا ئامادەبوون : پۆلی کازمی و حکومەتی هەرێم و ئەردۆگان لەلایەک و پۆلی پەکەکە و حەشد و ئێران لەلایەکی ترەوە. ئەم دوو پۆلە لە چەندین بواردا و لەسەر خاکی عێراقدا لە ململانێدابوون و هەر لە سنورەکانی سوریاوە تا دەگاتە سنجار و قەندیل خاکی بەریەککەوتنی جیۆپۆلیتیکیان بووە.

10. ئایا چرکەساتی قاسم موسلیح هاوکێشەی ئەم پۆلانە تێکدەدات ؟ ئایا هەلومەرجی بابەتی ڕێگادەدات بەوەی کە جەنابی موستەفا کازمی پشتبکاتە سەدر و هەرێم ؟ ئایا بەبێ ئەم دوانە دەتوانێت ببێتەوە بە سەرۆک وەزیران؟ ئایا هێزێکی هاوپەیمانی نێودەوڵەتی کە لەیەکاتدا دەکرێت دۆستی کازمی و هەرێمیش بێت و گرفتی لەگەڵ سەدریشدا نەبێ، دەتوانێ هەموو ئەمانە پێکەوە کۆبکاتەوە و لەو تونێلە تاریکەی عێراقدا، هاوکاریی عێراقیەکان بکات بۆئەوەی مۆمێک داگیرسێنن ؟

ليست هناك تعليقات

إرسال تعليق

adv/https://www.facebook.com/QaiwanGroup|https://i.postimg.cc/Nfy5msCp/Kurd-Plate-Qg-12-4.gif