شاندی باڵای حكومەتی هەرێم لە بەغداد لەگەڵ دەستەی سیاسی ڕەوتی سەدر كۆبووەوە و قوباد تاڵەبانی ڕایدەگەیەنێت، دە‌بێت هەوڵبدەین کێشەکان لە عێراق و هەرێمی کوردستانیش پێکەوە چارەسەربکەین.
شاندی باڵاى حکومەتی هەرێمی کوردستان بەسەرۆکایەتی قوباد تاڵەبانی جێگرى سەرۆکی ئەنجومەنى وەزیران ئەمڕۆ چوارشەممە لە شارى بەغداد سەردانی دەستەى سیاسی رەوتی سەدری کرد و لەلایەن نەسار ڕوبەیعی و ژمارەیەک سەرکردەى باڵاى دەستەکەوە پێشوازیکران.
بەپێی ڕاگەیەنراوێكی نوسینگەكەی لەکۆبونەوەکەدا گفتوگۆ لەبارەى پەیوەندییە دووقۆڵییەکان کرا و جێگرى سەرۆکی ئەنجومەنى وەزیران سوپاسیکردن کە لەکاتی پەسەندکردنی بودجەى ساڵى 2021ى فیدراڵی هاوکاربوون تا لەگەڵ لایەنەکان و لەناو ئەنجومەنى نوێنەرانی عێراقدا ڕێکەوتن بکرێت لەبارەى یاساى بودجە،
قوباد تاڵەبانی وتیشی، “کێشەى بەغداد کێشەى ئێمەشە و بێگومان کێشەى هەرێمی کوردستانیش کێشەى عێراقە، بۆیە دەبێ هەوڵبدەین کێشەکان لە عێراق و هەرێمی کوردستان پێکەوە چارەسەربکەین”.
لەبەرامبەردا نەسار روبەیعی سوپاسی هەوڵەکانی قوباد تاڵەبانی و وەفدى باڵاى دانوستانکارى حکومەتی هەرێمی کرد بۆ نزیککردنەوەى ڕاوبۆچوونی لایەنەکان سەبارەت بەچارەسەرکردنی کێشە هەڵپەسێردراوەکان بەتایبەتی بودجە، راشیگەیاند کە پەسەندکردنی بودجە بەو شێوازە، زەمینە لەباردەکات بۆ چارەسەرکردنی کێشە هەڵپەسێردراوەکانی تر، وەك ئەوەی لە ڕاگەیەنراوەكەدا هاتووە.
هیواشیخواست هەمیشە نزیکبوونەوە هەبێت لەنێوان هەرێمی کوردستان و عێراق بۆ چارەسەرکردنی گرفتەکان.
ليست هناك تعليقات
إرسال تعليق