کۆبونەوەی شاندی نێوان یەکێتی و پارتی لە سەرۆکایەتی هەرێم کۆتایهات و ڕاگەیەندراوێکی هاوبەشیان لەسەر ئەنجامی کۆبونەوەکە بڵاوکردوە.
بەگوێرەی دەقی ڕاگەیەندراوەکە هەردوولا کۆکبوون لەسەر ئەوەی له‌گه‌ڵ لایه‌نه‌كانی دیكه‌ی هه‌رێمی كوردستان هه‌نگاوی جددی و كرده‌یی بنێن بۆ چاره‌سه‌ركردنی گرفته‌كانی نێوانیان و هه‌موو تواناكانیان بخرێنه گه‌ڕ بۆ ڕووبه‌ڕووبوونه‌وه‌ی ئه‌م بارودۆخه و پشتیوانیی دامه‌زراوه‌كانی هه‌رێمی كوردستان بۆ خزمه‌تكردنی هاووڵاتیان.
هەروەها یەکێتی و پارتی لەسەر پرسی پاراستنی سەقامگیری و ئارامی هەرێمی کوردستان کۆکبوون و ڕایانگەیاندوە پاراستنی ئەرکی هەموو لایەکە.
ده‌قی راگه‌یه‌ندراوه‌كه:
كۆبونه‌وه‌ی هاوبه‌شی
پارتی دیموكراتی كوردستان و یه‌كێتیی نیشتمانیی كوردستان
ئه‌مڕۆ دوشه‌ممه ٢٠٢٠/٩/١١ له سه‌رۆكایه‌تیی هه‌رێمی كوردستان، به سه‌رپه‌رشتیی به‌ڕێز نێچیرڤان بارزانی، سه‌رۆكی هه‌رێمی كوردستان و به ئاماده‌بونی به‌ڕێز بافڵ تاڵه‌بانی، هاوسه‌رۆكی یه‌كێتیی نیشتمانیی كوردستان، پارتی دیموكراتی كوردستان و یه‌كێتیی نیشتمانیی كوردستان كۆبونه‌وه.
له كۆبونه‌وه‌كه‌دا وێڕای به‌خێرهێنان و سوپاسكردنی شاندی هه‌ردولا له‌لایه‌ن به‌ڕێز سه‌رۆكی هه‌رێمی كوردستانه‌وه، تیشك خرایه سه‌ر بارودۆخی سیاسی به‌گشتی و بارودۆخی عێراق و هه‌رێمی كوردستان و ئه‌و گیروگرفتانه‌ی به‌رۆكی خه‌ڵكی هه‌رێمی كوردستانیان گرتوه، به‌تایبه‌تی له‌ڕوی ئابوری و داراییه‌وه كه به‌هۆی لێكه‌وته‌كانی بڵاوبونه‌وه‌ی ڤایرۆسی كۆرۆناوه، جیهان و عێراق و هه‌رێمی كوردستانی گرتوه‌ته‌وه.
به‌ڕێزیان جه‌ختی له گرنگیی كاری هاوبه‌شی نێوان سه‌رجه‌م لایه‌نه سیاسییه‌كانی هه‌رێمی كوردستان، به‌تایبه‌تی نێوان پارتی و یه‌كێتی كرده‌وه و ئاماده‌ییی سه‌رۆكایه‌تیی هه‌رێمی كوردستانی نیشان دا بۆ پاڵپشتی و هاوكاریی سه‌رخستنی كاری پێكه‌وه‌یی و هه‌ماهه‌نگیی نێوان هه‌مو لایه‌نه‌كان.
دواتر شاندی هه‌ردولا گفتوگۆی ڕاشكاوانه و به‌رپرسانه‌یان له‌سه‌ر كۆی پرسه‌كان كرد و دوپاتی به‌رپرسیاریه‌تیی هاوبه‌شیان به‌رامبه‌ر پرۆسه‌ی سیاسی و حوكمڕانی له هه‌رێمی كوردستان كرده‌وه. هه‌ردولا كۆك بون كه پێویسته پێكه‌وه له‌گه‌ڵ لایه‌نه‌كانی دیكه‌ی هه‌رێمی كوردستان هه‌نگاوی جددی و كرده‌یی بنێن بۆ چاره‌سه‌ركردنی گرفته‌كانی نێوانیان و هه‌مو تواناكانیان بخرێنه گه‌ڕ بۆ ڕوبه‌ڕوبونه‌وه‌ی ئه‌م بارودۆخه و پشتیوانیی دامه‌زراوه‌كانی هه‌رێمی كوردستان بۆ خزمه‌تكردنی هاوڵاتیان.
بارودۆخی ئه‌منیی هه‌رێمی كوردستان و ڕێزگرتن له قه‌واره‌ی سیاسی و ده‌ستوریی هه‌رێم ته‌وه‌رێكی دیكه‌ی كۆبونه‌كه بو. هه‌ردولا كۆك بون كه پاراستنی ئارامی و سه‌قامگیریی هه‌رێمی كوردستان، ئه‌ركی هه‌مو لایه‌كه.
هه‌ردولا پشتگیریی خۆیان بۆ ئاماده‌كارییه‌كانی حكومه‌تی فیدراڵ و لایه‌نه په‌یوه‌نداره‌كان بۆ سه‌رخستنی هه‌ڵبژاردنی پێشوه‌خته‌ی عێراق دوپات كرده‌وه و له‌م ڕوه‌وه هه‌ماهه‌نگی و هاوكاریی نێوان نوێنه‌رانی هه‌رێمی كوردستان له به‌غدا به‌رز هه‌ڵسه‌نگێنرا و دوپاتی به‌رده‌وامیی ئه‌و هه‌ماهه‌نگییه كرایه‌وه.
له ته‌وه‌رێكی دیكه‌ی كۆبونه‌وه‌كه‌دا هه‌ڵسه‌نگاندن بۆ جێبه‌جێكردنی ڕێككه‌وتنه سیاسی و ئیدارییه‌كانی نێوان هه‌ردولا كرا، له نێویشیاندا بابه‌تی لامه‌ركه‌زییه‌ت له هه‌رێمی كوردستان. هه‌ردولا پابه‌ندیی خۆیان دوپات كرده‌وه به ڕێككه‌وتنی سیاسیی نێوانیان و به‌رنامه‌ی كاری كابینه‌ی نۆیه‌می حكومه‌تی هه‌رێم بۆ به‌رجه‌سته‌كردنی لامه‌ركه‌زییه‌ت له هه‌رێم و شۆڕكردنه‌وه‌ی ده‌سه‌ڵاته‌كان و له‌ئه‌ستۆگرتنی به‌رپرسیاریه‌تیی ھاوبه‌ش و نه‌هێشتنی ڕۆتین له ڕاییكردنی كاری هاوڵاتییان و پێشكه‌شكردنی پڕۆژه و خزمه‌تگوزارییه گشتیه‌كان. له‌م ڕوه‌وه هه‌نگاوه‌كان به ئه‌رێنی هه‌ژمار كران و دوپاتی به‌رده‌وامیی كاری هاوبه‌ش بۆ جێبه‌جێكردنی ته‌واوی ڕێككه‌وتنه‌كان كرایه‌وه و میكانیزمی گونجاو له‌و ڕوه‌وه بڕیاری لێدرا.
له كۆتاییی كۆبونه‌وه‌كه‌دا، دوپاتی به‌رده‌وامیی كاری هاوبه‌ش و هه‌ماهه‌نگی له‌ناو دامه‌زراوه‌كانی هه‌رێمی كوردستاندا كرایه‌وه كه ئامانج لێی خزمه‌تكردنی هاوڵاتیان و تێپه‌ڕاندنی ئه‌و بارودۆخه سه‌خته‌ی سه‌ر شانی خه‌ڵكی هه‌رێمی كوردستان بێت.
پارتی دیموكراتی كوردستان
یه‌كێتیی نیشتمانیی كوردستان
٢٠٢٠/٩/١١
ليست هناك تعليقات
إرسال تعليق