كانگای زێڕ لە گوندێكی كوردستان دەدۆزرێتەوە

لە گوندێكی پارێزگای ئاگری باكووری كوردستان كانگای زێڕ دۆزرایەوە، ئەو ھەواڵەش وەك مژدە بە خەڵكی پارێزگاكە دەدرێت.

پارێزگاری ئاگری وەك یەكێك لە ناوچە دەوڵەمەندەكان بە سرووشتی جوان و خاكی بەپیت ناسراوە، ئێستا دۆزینەوەی كانگای زێڕ لەو پارێزگایە بووەتە رۆژەڤ.

ئەكرەم چەلەبی، پەرلەمانتاری ئاكەپە بە میدیاكانی راگەیاند: "گوندی مۆڵاکارایای سه‌ر به‌ ناوچه‌ی گییادینی شاری ئاگری باکووری کوردستان، لەلایەن كۆمپانیایەك كانگای زێڕ دۆزراوەتەوە".

ئەو پەرلەمانتارە ئاماژەی بەوەشدا: "ئاگری جگە لە سرووشتەكەی خاكەكەشی بە گەوھەری زێڕ دەوڵەمەندە، دۆزینەوەی كانگای زێڕ وەك مژدە بە خەڵكی ناوچەكە دەدەین، ئاگری لەمەودوا دەبێتە شارێكی زێڕین".

ئاشكراشی كرد: "نموونەی زێڕی ئاگری بۆ پشكنین رەوانەی وڵاتان كراوە و چاوەڕێی ئەنجامەكانین، دوای لێكۆڵینەوە لەسەر كاریگەرییەكانی ژینگە و جۆری زێڕەكە، لە ساڵی 2023 وەبەرھێنان لە زێڕی ئاگری دەست پێدەكات".