مامۆستا عادل حسن، یەكێك لە ئەندامانی ئەنجومەنی مامۆستایانی ناڕازی، نامەیەك ئاراستەی وەزیری پەروەردە دەكات، سەبارەت بە خوێندنی ساڵی نوێی خوێندن و پرۆسەی پەروەردە و بڕیارەكانی حكومەت، لە بەشێكی نامەكەدا عادل حسن دەنوسێت: تەنها باگراوندی پشتی دەرکردنی ئەم بڕیارە ئەوەیە حکومەتی هەرێم نایەوێ لە کاتی خۆیدا مووچە بدات و دەشزانێ ئەو کارە لەلایەن مامۆستایانەوە قبوڵ ناکرێت و بایکۆت و ناڕەزایەتیەکان دەست پێ دەکەن بۆیە لەترسی ناڕەزایەتیەکانی مامۆستایان ئەم بڕیارەی داوە .
دەقی نامەی مامۆستا عادل حسن بۆ وەزیری پەروەردە
نامەیەکی کراوە بۆ بەڕێز وەزیری پەروەردە
پاش ڕێز و سڵاو
جەنابی وەزیر بڕیارەکەی ئەمڕۆی ئەنجومەنی وەزیران جێگەی تێڕامان و هەڵوێستە لەسەر کردنە ، بەتایبەتی کە بەڕێزت وەکو وەزیری پەروەردە ئاگاداری ئەو پرۆسەیە لە وەرزی دووەمی ساڵی ڕابوردوو شکستی هێنا و کەمترین مامۆستا و قووتابی پێشوازیان لێ کردوو و جێ بەجێیانکرد
بۆیە ئێوەش نەتان توانی ئەو بابەت و وانانەی بە ئۆنلاین خوێنرابوون داخڵی تاقیکردنەوەکانی بکەن .
ئێستاش حەزدەکەم وەکو مامۆستایەک چەند سەرجێک لەسەر ئەم بڕیارە بۆ بەڕێزتان و ئەنجومەنی وەزیران و هەموو خەمخۆرانی پەروەردە بخەمە ڕوو .
١ ـ تەنها باگراوندی پشتی دەرکردنی ئەم بڕیارە ئەوەیە حکومەتی هەرێم نایەوێ لە کاتی خۆیدا مووچە بدات و دەشزانێ ئەو کارە لەلایەن مامۆستایانەوە قبوڵ ناکرێت و بایکۆت و ناڕەزایەتیەکان دەست پێ دەکەن بۆیە لەترسی ناڕەزایەتیەکانی مامۆستایان ئەم بڕیارەی داوە .
٢ ــ خوێندنی ئۆنلاین لە وڵاتە پێشکەوتوەکان و ئەوروپاش بۆ قۆناغی بنەڕەتی { ١ تا ٩ } بەکار ناهێنرێ و سەرکەوتوو نەبوو ، لە کوردستانێک ئاستی خوێندنی زۆر لە ئەوان دواکەوتووترە چۆن دەتوانێت سەرکەوتووبێت .
٣ ــ پۆلەکانی بازنەی یەکەم { ١-٢-٣-٤ } لە پۆلی دوانزە گرنگترن و پێویسترن و بناغەی فێربوونی قوتابین ، کە بەهیچ شێوەیەک ناتوانرێت بە ئۆنلاین فێربکرێن ، دڵنیابن قوتابیانی پۆلی یەکەمی ساڵی پار زۆربەیان تا ئێستا پیتەکان ناناسن و فێری خوێندن و نوسین نەبوون ، وە من وەکو توشبوویەکی کۆرۆنا کە سێ منداڵم لەو بازنەیە وسەروتر هەیە ، بۆم دەرکەوت منداڵ ئەگەری توشبوونی بە کۆرۆنا زۆر کەمە ، من بیست ڕۆژ کۆرۆنا ئازاری دام هیچ خۆجیاکردنەوەو دابڕانێکم لە منداڵەکانم نەکرد و هیچ کام لە منداڵەکانم تووشی کۆرۆنا نەبوون .
٤ ــ هەموو زانایانی پەروەردەی منداڵ و دەرونناسان یەک دەنگن لەسەر ئەوەی بەکارهێنانی مۆبایل و ئایپات و ئامێرەئەلکترۆنیەکان زیانی گەورە بە منداڵان و قوتابیان دەگەیەنێت ، سەرەڕای ئەوەی ناتوانن لە ڕێگەیانەوە فێرببن ، زیان بە پەروەردە و زیرەکی و باری دەرونی و جەستەیی و تواناکانیان دەگەیەنێت .
٥ ــ بە ئەلکتڕۆنی کردنی خوێندن لە کوردستاندا ، دەبێت بە بەشێک لە پرۆسەی بێڕێزکردنی خوێندن و زانست و بڕوانامە ، لە دواجاردا نەوەیەکی نەزان و نەخوێندەوار پێشکەش بە کۆمەڵگە و ئایندە دەکرێت .
٦ ــ پێویست بوو وەزیری پەروەردە و ئەنجومەنی وەزیران پێش ئەوەی لە بیری کردنەوەی دەرگای قوتابخانەکاندا بن لە لە خەمی چارەسەرکردنی کێشەکانی مامۆستایاندا بوونایە وەکو پێکهێنەرێکی سەرەکی پرۆسەی پەروەردە ، ئەوکات تووشی ئەم بڕیارە ناتەواوانە نەدەبوون .
لە کۆتایدا
دڵنیام وەزیری پەروەردەش لەگەڵ ئەم بڕیارەدا نەبووە و لەلایەن ئەنجومەنی وەزیڕانەوە بە سەریدا سەپێنراوە ، بۆیە دڵنیابن بڕیارێکی لەو شێوەیە هەرگێز جێ بەجێ ناکرێت و پرۆسەی پەروەردە بە تەواوی پەکی دەکەوێت و نەوەیەکی نەزان و نەخوێندەوار بۆ ئایندە ئامادە دەکرێت .
هاوکات هیوادارم گوێ لە دڵسۆزان بگیرێت و داوا ڕەواکانی مامۆستایان جێ بەجێبکرێن و پڕۆسەیەکی تەواو تەندروست بڕیاری لەسەر بدرێت .
والسلام
عادل حسن حمەڕشید
مامۆستا
ليست هناك تعليقات
إرسال تعليق