ئەنجومەنی مامۆستایانی ناڕازی: فریای بادینان بكەون

لە ئەنجوومەنی مامۆستایانی ناڕازییەوە 

تکایە فریای بادینان بکەون 

بۆ

ڕێکخراوی نەتەوە یەکگرتووەکان 

ڕێکخراوەکانی مافی مرۆڤ

قونسوڵخانەی وڵاتان لە هەرێمی‌ کوردستان 

پەرلەمانی کوردستان

ئەنجوومەنی نوێنەرانی عێراق

حیزب و لایەنە سیاسییەکان

سەرجەم دەزگاکانی ڕاگەیاندن 

هەموو مرۆڤە ئازادیخوازەکان

وەک ئاشکرایە ماوه‌ی چه‌ند ڕۆژێكه‌ و به‌ تایبه‌تی له‌ ڕێكه‌وتی 13/8/2020 ەوه‌ تا ئه‌مرۆ، ده‌زگا ئه‌منییه‌كانی پارێزگای دهۆك له‌ هه‌وڵێكی نادیموكراسی و ده‌ره‌وه‌ی چوارچێوه‌ی یاسا كارپێكراوه‌كان، به‌ ده‌یان مامۆستا، چالاكوان، هاوڵاتی و ڕۆژنامه‌نووسی سنوری پارێزگای دهۆكیان ده‌ستگیر كردووه‌، كه‌ به‌پێ زانیارییەکانی ئێمە ژماره‌یان (55) كه‌سه‌. هه‌روه‌ها زیاتر له‌ سه‌د مامۆستا و ڕۆژنامەنووس و چالاکوان و هاوڵاتیی خۆپیشانده‌ر له‌ قه‌زای زاخۆ ده‌ستبەسه‌ركراون و بەپێی زانیارییەکانمان دۆخی تەندروستییان زۆر خراپە.

ئێمە لە ئەنجوومەنی مامۆستایانی ناڕازی، هەڵوێستی خۆمان سەبارەت بەم ڕەشبگیرییە لە چەند خاڵێکدا دەخەینەڕوو: 

1 ــ بەتوندی ئیدانەی ئەو ڕفاندن و ئەشکەنجەدان و دەستگیرکردنانە دەکەین و داواکارین بە زووترین کات سەرجەم دەستگیرکراوان ئازاد بکرێن.

2 ــ ئه‌م پڕۆسه‌ی ڕه‌شبگیرییە بەبێ بڕیاری دادگا بووە و پێچەوانەی یاسایە، هاوکات (مامۆستایان، چالاكوانان، ڕۆژنامەنووسان) به‌ شێوازێكی نایاسایی دەستبەسه‌ركراون بەبێ هه‌بوونی هیچ تاوانێك، ته‌نانه‌ت دەستگیرکراوانی دهۆک لە به‌شداربووانی خۆپیشاندانیش نه‌بوون.

3 ــ ئەم کارانە بە مەترسییەکی گەورە دەزانین بۆ سه‌ر پڕۆسه‌ی دیموكراسیی هه‌رێمی كوردستان و پێشێلکارییەکی ئاشکرای جاڕنامەی گەردوونیی مافەکانی مرۆڤ و ئازادیی ڕادەربڕین و خۆپیشاندان و یاسا کارپێکراوەکانی هەرێمی کوردستانە.

4 ــ داوا لە ڕێکخراوی نەتەوە یەکگرتووەکان و ڕێکخراوەکانی مافی مرۆڤ و پەڕلەمانی کوردستان و عێراق و قونسوڵخانە و نوێنەری وڵاتان دەکەین؛ هەوڵەکانیان بخەنەگەڕ بۆ ئازادکردنی دەستگیرکراوان و ڕاگرتنی فشارەکان و کۆتایی هێنان بە پڕکردنەوەی بەڵێننامە بە مامۆستایان و چالاکوانان.

5 ــ داوا لە حیزب و لایەنە سیاسییەکان دەکەین هەڵوێستی فەرمیی خۆیان لەسەر ئەم کارە نامرۆڤانانە ڕابگەیەنن و هەوڵەکانیان بخەنەگەڕ بۆ کۆتایی هێنان بە دەستگیرکردن و ڕاوەدوونان و ئەشکەنجەدان .

لە کۆتاییدا، جارێکی تر بە توندی ئیدانەی ئەو دەستگیرکردن و ڕفاندنانە دەکەین و داواکارین بە زووترین کات دەستگیرکراوان ئازاد بکرێن. هاوکات داواکارین پڕکردنەوەی بەڵێننامەی زۆرەملێیی بە چالاکوانان و مامۆستایان و بە سەربازگەکردنی شارو شارۆچکەکان کۆتایی پێ بهێنرێت.

ئەنجوومەنی مامۆستایانی ناڕازی 

26/8/2020