ئەنجیلینا جولی بۆ یەکەمینجار هۆکاری جیابونەوەی ئاشکرادەکات

ئەستێرەی هۆلیوود ئەنجیلینا جولی، بۆیەکەمینجار هۆکاری جیابونەوەی لە براد پیت ئاشکراکرد و وتی لە پێناو منداڵەکانم ئەم بڕیارەمداوە.

ئەنجیلینا جولی لە میانەی چاوپێکەوتنێک لەگەڵ گۆڤاری Vogueی ئەمریکی، باسی لەهۆکاری جیابونەوەی کرد و وتی، "من جیابونەوە لەپێناو دڵخۆشی خێزانەکەم، بڕیارێکی دروستمدا، هەوڵدەدەم سەرنجم لەسەریان بێت بۆئەوەی بتوانن ئەو دۆخە تێبپەڕێنن".

وتیشی، "من بێدەنگ بوم و باسم نەدەکرد، بەڵام میدیاکان سودیان لەم بێدەنگیەی من دەبینی و هەواڵی ناڕاستیان بڵاودەکردەوە، کاتێک منداڵەکانم ئەم درۆیانەیان دەبینی کاریگەری لەسەریان دەبو، بەڵام من بەبیرمدەهێنانەوە کە باوەڕ بەدرۆی میدیاکان نەکەن و راستیەکان لەزاری خۆمەوە ببیستن، لەراستیدا هەر شەش منداڵەکەم زۆر بوێر و بەهێزن".

ئەنجیلینا و براد پیت لەساڵی 2004 بەهۆی بەشداریکردنیان لە فیلمێکدا یەکترییان ناسی، لە ساڵی 2014 ژیانی هاوسەرگیرییان پێکهێنا، دو ساڵ دواتر جیابونەوە، خاوەنی شەش منداڵن، سیانیان منداڵی راستەقینەی خۆیانن.