كۆسرەت ڕەسول علی، سەرۆكی ئەنجومەنی باڵای سیاسی و بەرژەوەندی یەكێتی، ڕاگەیەنراوێكی بڵاوكردەوە سەبارەت بە هێرشەكەی تیرۆرستانی داعش بۆ سەر گوندەكانی داراو مێخاس و تیایدا هاتوە: بەوپەڕی نیگەرانیەوە ڕایدەگەیەنین كەناكرێ چیتر خوشك و براكانمان بكرێنە قوربانی نەبوونی پلانی تۆكمەی هێزە ئەمنییەكانی ناوچەكە
دەقی پەیامەكەی كۆسرەت ڕەسول علی
بەداخەوە دوێنێ شەو، تیرۆرستان و تاریكپەرستان هێرشیان كردە سەر هەردوو گوندی داراو مێخاس لە سنووری خانەقین و لە كردەوەیەكی تیرۆریستی دوور لە هەموو بەهایەكی مرۆڤایەتی ٧ هاووڵاتی كاكەییان شەهید و ٥یشیان بریندار كرد، پرسەو سەرەخۆشی خۆمان ئاراستەی خوشك و برا كاكەییەكانمان دەكەین و هیوای زوو چاكبوونەوە بۆ برینداران دەخوازین.
وێڕای ئیدانەكردنی ئەم تاوانە دڕندانەی تیرۆرستان و. نیگەرانی قووڵمان لەدۆخی ناوچە كوردستانییەكان، داواكارین هەرچی زووە دۆخی ئەمنی ئەم ناوچانە باش بكرێ و بەوپەڕی نیگەرانیەوە ڕایدەگەیەنین كەناكرێ چیتر خوشك و براكانمان بكرێنە قوربانی نەبوونی پلانی تۆكمەی هێزە ئەمنییەكانی ناوچەكە، ئەم ڕووداوەو ڕووداوەكانی ڕابردووی ئەم ناوچە كوردستانیانە زەرورەتی گەڕانەوەنەی هێزی پێشمەرگەمان بۆ دەردەخا، بۆیە پێویستە هەرچی زووە حكومەتی عێراقی و حكومەتی هەرێم هەماهەنگی بكەن بۆ گەڕاندنەوەی هێزی پێشمەرگە بۆ ئەو ناوچانەو پاراستنی سەرو ماڵی هاووڵاتیان لە هێرشە دڕندانەكانی تیرۆرستان و دوورخستنەوەی مەترسی تیرۆر لەسەر ناوچەكە.
كۆسرەت ڕەسول عەلی
سەرۆكی ئەنجومەنی باڵای سیاسی و بەرژەوەندی
یەكێتی نیشتمانی كوردستان
ليست هناك تعليقات
إرسال تعليق