ئێدێ دڤێت گومانێ ژ مرۆڤبوونا خوە بکەین !!

ليست هناك تعليقات


عەگید سەلیم

ئەگەر بێ کەرامەتی تشتەک بیت و مرۆڤی بکەتە بوونەوەرەکێ پارچەپارچە و وێرانکری، وی دەمی کەرامەت ئەو تشتە کو وان پارچان و لەشێ وێرانکری کومڤەدکەت و جارەکا دی دکەتە مرۆڤ ڤە. ئەڤە تێگەھشتنا دەروونناسەکێ ئەمریکی یە سەبارەت تێگەھێ کەرامەتێ .

دڤی چوارچێوەیدا، سەدێ بیستێ وەک سەردەم و قوناغەک پر مەترسی ژ ئەنجامێ سیاسەتا داگیرکرنێ و قرکرنێن ھەمبەری گەلێ مە ستراتیژ و جەوھەرا پروسێن داگیرکرنێ، دروستکرنا تاک و جڤاک و رەوشەکا سەپاندی، کو تێدا نرخ و بھایێ ھەری ڤالاو بێ ھێز کەرامەت بوو .ئەو ھێز و کەسایەتیێن دگەل دوژمنان، بووینە بەشەک ژ خیانەت و شەرو شەرمزاری و مالوێرانیا کوردان، تا راددێ بەشداربوونێ د پروسەیێن ئەنفال و تاوانێن جودا جودا دگەل نەتەوێ خوە ! ب ئاوایەکێ دیار گەھشتنا وی مرۆڤی بۆ ب گوپیتکا ڤالا بوونا نرخێن ئەخلاقی و ویژدانی و پارچە پارچەبوونا کەسایەتیا وی و ڤالا بوون ژ کەرامەتێ .

تێگەھێ کەرامەتێ د فەلسەفا ئەخلاقیا (ئیمانوێل کانت)دا خوەدی گرنگیەکا زورە، کانت دبێژیت ھەر مرۆڤەک بشێت یێ ئازاد بیت و خودان عەقل و ھزرکرنەکا سەربخو بیت، ئەو مرۆڤ مرۆڤەکێ خودان کەرامەتە !! دڤێ پێناسا کورتا کانت بۆ کەرامەتێ، تێگەھێن ئازادی و عەقلی جھەکێ گرنگ د بەرێخوەدانا کانتی بۆ مژارا کەرامەتێ دگرن .

ھەلبەت ئەزموونا حوکمرانیا کوردی ل زور ئالیانڤە درێژە پێدەرێ سیاسەتا داگیرکەرێن کوردستانێ بوو، ژ بۆ شکاندنا کەرامەتا مرۆڤێ کورد و سیھ سالێن ئەتەککرن و یاریکرن بوو ب ئازادی و خەون و ھەست و عەقلێ مرۆڤێ کورد .

چیروکێن تراژیدیێن شەرێ براکوژیێ و تیرورا سیاسی و رۆژنامەڤانی و برسیکرنا خەلکی و ب کارتونیکرنا دام و دەزگەھێن حوکمرانیێ... ئەزموونا شەقلێدانا ئازادیێ و عەقلێ مرۆڤێ کورد بوو .

جڤاکەک ل سەدێ بیست و ئێکێ، بازرگانێن وێ یێن سیاسی ئاستێ تەماعیا وان بچیتە پارێ زارۆکێن پەنجەشێرێ و مووچێ ئەنفال و زارۆکێن شەھیدا و تژی گەری و زکێ ڤی خەلکی دەرمان و خارنێن ئێکسپایەر بیت ...ژبلی کو شێواز و فورمێ دەستەلاتداریێ فورمەک مافیگەری و چەتەگەریێ بخوەڤە دبینیت، د ھەماندەمدا جڤاک و تاکێن ل بن سیبەرا حوکمرانیەک بڤی ئاوای، د کەڤنە ھەمبەر پرس و گومانێن مەزن !!

د ھندەک دیاردەو بوویەراندا، مرۆڤ دکاریت بێژیت ئەڤ جڤاکە نە ل سەدێ بیست و ئێکێ دژیت و ھەمان نرخ و بھایێن جڤاکێن سەدێن تاری تێدا زالە و ئەڤ جورێ بەلاڤکرنا وێنان، دگەل بەرپرسان و ئاغایێن سیاسی و گەرمکرنا مەدح و پەسن و سوپاسگوزاریان و ھەویێن پیروزبایێ لێکرنێ و پروسەیا خوە نمایشکرنێ و گەرمکرنا بازارێ مەلاقیێ و کوێلایەتیێ، نە ب تنێ ل سەر ئاستێ تاکێن سادەیێن ڤی ولاتی، بەلکو وەک (بەختیار عەلی) دبێژیت: جەھل ئەڤرو د ناڤەندێن جودا جودایێن مەدا حزورەکا ب ھێز ھەیە و ب مخابنیڤە ھژمارەکا مەزن ژ ب ناڤ رەوشەنبیر و رۆژنامەڤان و رێڤەبەر و ماموستا، خوە دناڤا ڤی خێما جەھالەتێدا خوە بەندکریە !!

ل دوماھیکێ داکو جڤاک رووبەرەکێ بەرفرەھ بۆ بھێز ئێخستنا تێگەھێ کەرامەتێ فەراھەم بکەت، پێتڤی یە ژینگەھەک بھێتە رەخساندن کو مرۆڤ ب ئازادانە مومارسا ئازادیا خوە و ب کار ئێنانا عەقل و ھزرکرنا خوە بکەت،نە ئازادی دبن سیبەرا حوکمەک بڤی ئاوایدا پەیدا دبیت، نەک ژی تاکەک عەقلانی ب سوپاسگوزاری و خوەدی مەیلا کوێلایەتی و سەرھەژاندن و دەستقوتانێ دروست د بیت، لێدان ل ئازادی و یاریکرن ب عەقلێ مرۆڤی، لێدانە ل کەسایەتی و کەرامەتا مرۆڤی .

.



ليست هناك تعليقات

إرسال تعليق