ئەگەری سزادانی یانەی هەولێر بە تووندی لە ئارادایە

ژمارەیەک راهێنەر و یاریزانی پێشووی یانەی هەولێر، بەهۆی نەدانی ماف و پارەی گرێبەستەکانیان سکاڵایان لەسەر یانەی هەولێر بەرزکردووەتەوە بۆ یەکێتیی تۆپی پێی ئاسیا.

بەرزکردنەوەی سکاڵای ئەو راهێنەر و یاریزانانە لە رێگای پارێزەرێکی میسرییەوە بووە، یەکێتیی تۆپی پێی ئاسیاش بە فەرمی یانەی هەولێری لەوە ئاگادارکردووەتەوە ئەگەر تااوەکو رۆژی 30ـی مانگی سێپتێمبەر مافەکانی ئەو راهێنەر و یاریزانانە نەداتەوە دادەبەزێندرێت بۆ خولی یانە پلە دووەکانی عێراق.

لوئەی سەڵاح، ئەستێرەی پێشووی یانەی هەولێر، لە لێدوانێکی تایبەت بە تۆڕیی میدیایی رووداو رایگەیاند "ئێمە داوای مافەکانی خۆمان کردووە و دەبێت یانەی هەولێر داواکارییەکەمان جێبەجێ بکات". 

سەڵاح کە یەکێک بوو لە گۆڵکارەکانی یانەی هەولێر، ئاماژەی بەوەشکرد "ئێستاش خۆشەویستییەکی زۆرم بۆ یانەکە و هاندەرانی هەیە، چونکە رۆژانی زێڕینم لەگەڵی بووە، بەڵام دەبێت بەرپرسان و خەمخۆرانی هەولێر بەدەنگ یانەکەوە بچن و هاوکاری دارایی بکەن". 

ئەمە لیستی ناوی ئەو راهێنەر و یاریزانانەیە کە سکاڵایان لە یانەی هەولێر کردووە: 

ئەیوب ئۆدیشۆ راهێنەر، جەلیل زێدان راهێنەری گۆڵپارێزان. 

یاریزانەکان: لوئەی سەڵاح، عەلی فایز، نەبیل سەباح، ئەحمەد محەممەد، سەعد عەبدولئەمیر، موسەنا خالید. 

یانەی هەولێر خاوەن چوار نازناوی خولی یانە نایابەکانی عێراقە و دووجاریش پلەی دووەمی جامی یەکێتیی یانەکانی ئاسیا بەدەستهێناوە.

یانەی هەولێر هەڕەشەی سزادانێكی قورسی لەسەرە، ئەمە گرنگترین زانیارییەکانی تایبەت بە دۆسییەکەن: 

* 11 یاریزان سکاڵایان لەسەر تۆمارکردووە 

* نزیکەی 2.5 ملیار دینار قەرزارن

* پارەی گرێبەستی یاریزانان و راهێنەرانە

* تاوەکو 30/9 مۆڵەتیان پێدراوە

* سکاڵاکان پەیوەستن بە ساڵانی 2013 و 2014ـەوە

* پارێزەرێکی میسری دۆسییەکەی بردووەتە AFC

* ئەگەر ئەو قەرزە نەدرێتەوە هەولێر سزادەدرێت

* دادەبەزێندرێ بۆ ریزی یانە پلە یەکەکان 

* یاریزانەکانی خولی عێراق لە یانەکانیان راپەڕیون 

* 150 یاریزان سکاڵایان لەسەر 13 یانە تۆمارکردووە 

* هەولێر پشکی شێری بەرکەوتووە بە 11 سکاڵا 

بڕی ئەو پارانەی کە یانەی هەولێر قەرزارە:

* لوئەی سەڵاح 450 ملیۆن دینار 

* ئەیوب ئۆدیشۆ 390 ملیۆن دینار

* نەبیل سەباح 390 ملیۆن دینار

* سەعد عەبدولئەمیر 380 ملیۆن دینار 

* عەلی فایز 310 ملیۆن دینار 

* ئەحمەد محەممەد 160 ملیۆن دینار 

* موسەنا خالد 140 ملیۆن دینار 

* جەلیل زەیدان 113 ملیۆن دینار