د.دانا حمەباقی: شێری زۆر بوو هەتا شێرە بەفرینەکان نەبوونە بازرگان و قاچاخچی نەوت

پرۆفیسۆر د.دانا حمەباقی، بەبێ ئەوەی ئاماژە بەوەڵامدانەوەی، د.شێركۆ عبدلڵە بكات، لە بەرامبەر دوو دێڕیدا كە لە نوسینێكیدا نوسیبوی( ‎بەس بزانم كوێیان نیشانی ئەو شاعیرە داوە، وا ئەڵێت كوردستان جێگای بەچكە شێرانە) 

دكتۆر دانا حمەباقی، بە زمانێكی پڕلە شانازی بۆ ڕابردوو و تەنز لە ئێستای ئەوانەی ئەم دۆخەیان گەیاندە ئەمڕۆ دەنوسێت(پردی (زەڵم)یان نیشان دابوو كە محمد گوڵپی، بە خەنجەر هەڵیكوتایە سەر زرێپۆشەكە.

دەقی نوسینەكەی دكتۆر دانا حمە باقی

ـ پردی "زەڵم" یان نیشان دابوو، کە(موحەمەد گوڵپی)، کە ئەکاتە باوکی(فایەق گوڵپی) پزیشکی پسپۆری نەشتەرگەری گشتی، لە 1963/8/12 دوای سێ شەو و سێ ڕۆژ ڕێگری لەپەڕینەوەیان، کە فیشەکی پێ نەما بە خەنجەر هەڵیکوتایە سەر زرێپۆشەکان و لەدواوە شەهیدیان کرد ، و تەرمەکەیان بەدوای خۆیاندا بەشەقامەکانی سەیدسادق دا ڕاکێشاو سێ ڕۆژ لەسەرجادە هێشتیانەوە، هێندە داخی لەدڵیان نابوو.

ـ عمارە عطار یان نیشان دابوو ، کەدوای ڕاپەرینەکەو گەڕانەوە لە کۆڕەوەکە ، تەواریەکان ویستیان دەمانچە لە پێشمەرگەیەک بسەنن کە لەپاسێکی کۆستەردا بوو ، بەتەنها خۆی کەوتە شەر لەگەل مەفرەزەیەک هەتا فیشەکی لێ بڕا و لەبەردەم حوسینیەکەی ئێستا شەهیدیان کرد.

ـ قوتابخانەی سەرخێڵ یان نیشان دابوو لە هەڵەبجە کەساڵی 1983 جاشەکان هاتن بەزۆر تەلەبە بەرن بۆ موزاهەرە ، مامۆستایەکمان ناوی محمد بوو ، دوانیانی لەگۆڕەپانی قوتابخانە دایە بەرشەق هەتا پێلاوەکانی لەپێدا دڕا ، دوایی کوڕەکەی خۆی کە لەهەمان پۆلی ئێمە بوو، ناردی جووتی کڵاشی بۆ هێنا بۆئەوەی بەپێ خاوسی نەچێتەوە بۆ ماڵەوە. 

ـ ئامادەیی ڕۆشنبیریان نیشان دابوو ، کاتێ مامۆستا عەبدولای موعاون سالی 1990 بە تەلەبەکەی وت بۆ درەنگ هاتویت ، وتی من (اتحادی) م ، یەک شەقازلەی لێدا، مەگەر (اتحاد)ی بوونەکەی بە خەباتی ژێر زەمینی بۆ هەژمار کرابێ، ئەگینا ئێستاش لەبیری نەچۆتەوە.

ـ گوندنشینی چارە ڕەش یان نیشان دابوو ، کەپاروی دەمی مناڵەکانی ئەگرتەوە بۆ شۆڕش ، ئێستاش دوای بیست و نۆ ساڵ خودموختاری هێشتا تەماتەکەی نابێ بە دۆشاو.

ـ گەرمیان و کۆیستانیان نیشان دابوو کاتێ کە دەستی دا دەستی برای و هاتە نێو کۆڕی خەبات، ‌کیژی نەشمیل و لەبار و شۆخ و گوێ بە گواری کورد. 

ـ شێری زۆر بوو هەتا شێرە بەفرینەکان نەبوونە بازرگان و قاچاخچی نەوت و ئەسپی تەروادەی ڕۆم و عەجەم.

ڕەنج بەخەسار چێ هەر قەومێ، ڕابردووی، چون ئێستا، و داهاتووی ئەبێتەکەرەستەی گاڵتەجاری.

له‌ ده‌می ناڵه‌یی زارم دڵی پر زه‌مزه‌مه‌كه‌م 

وه‌لوه‌له‌ی حه‌لق وگه‌روی "نالی" له‌گه‌ردوون به‌ده‌ره‌ ...