KURDPLAT

سەرۆکی ئەمریکا دەڵێت، ئیسرائیل و ئێران بەم زووانە ئاشتییان دەبێت؛ ئاماژە بەوەش دەکات ئێستا زۆر هەوڵی کۆبوونەوە و گفتوگۆ بۆ کۆتاییهێنانی بە شەڕی نێوانیان دەدرێ.

رۆژی یەکشەممە، 15ی حوزەیرانی 2025، دۆناڵد ترەمپ، سەرۆکی ئەمریکا لە پەیامێکی نوێیدا لە تۆڕی کۆمەڵایەتی سۆشیاڵ ترووس رایگەیاند: "پێویستە ئێران و ئیسرائیل رێکبکەون و رێکیش دەکەون، هەروەک چۆن وام لە هیندستان و پاکستان کرد رێککەوتن بکەن، لە رێگەی بەکارهێنانی بازرگانی لەگەڵ ئەمریکا و پەنابردنەبەر ژیری و یەکگرتوویی و هۆشیاری بۆ نێو گفتوگۆکان لەگەڵ دوو سەرکردەی نایاب کە توانییان بەخێرایی بڕیار بدەن و شەڕ رابگرن."

ترەمپ لە درێژەی پەیامەکەیدا دەڵێت: "بەم زووانە ئاشتیمان لەنێوان ئیسرائیل و ئێران دەبێت. ئێستا چەندین پەیوەندی و کۆبوونەوە ئەنجام دەدرێن. من زۆر کار دەکەم، و هەرگیزیش ستایش ناکرێم، بەڵام کێشە نییە، خەڵکەکە تێدەگەن."

ئیدارەی ترەمپ لە مانگی نیسانەوە لەگەڵ ئێران لە گفتوگۆدایە تایبەت بە گەیشتن بە رێککەوتن لەبارەی بەرنامەی ئەتۆمیی ئێران و دوای پێنج گەڕ لە دانوستاندن، بڕیاربوو ئەمڕۆ یەکشەممە گەڕی شەشەم لە عومان بەڕێوەبچێت، بەڵام بەهۆی جەنگی نێوان ئیسرائیل و ئێران، ئەو گەڕە دواخرا و ئێران بڕیاریدا بەشداری نەکات.

دەقی پەیامەکەی دۆناڵد ترەمپ:

ئێران و ئیسرائیل دەبێت رێککەوتنێک بکەن و رێککەوتنیش دەکەن، هەروەک چۆن من وام لە هیندستان و پاکستان کرد رێککەوتن بکەن، لەو دۆخەدا بە بەکارهێنانی بازرگانی لەگەڵ ئەمریکا بۆ هێنانی لۆژیک، یەکڕیزی و ژیری بۆ نێو گفتوگۆکان لەگەڵ دوو سەرکردەی نایاب کە توانییان بەخێرایی بڕیار بدەن و بوەستن! هەروەها، لە ماوەی یەکەم خولی سەرۆکایەتیی مندا، سربیا و کۆسۆڤۆ ناکۆکییەکی تووندیان هەبوو، وەک چۆن بۆ دەیان ساڵ بوو وابوون، و ئەو ململانێ درێژخایەنە خەریک بوو ببێتە جەنگ. من رامگرت (بایدن بە چەند بڕیارێکی زۆر گەمژانە زیانی بە دەرفەتە درێژخایەنەکان گەیاند، بەڵام من چاکی دەکەمەوە، دیسانەوە!). دۆخێکی دیکە میسر و ئەسیوپیایە و شەڕەکەیانە لەسەر بەنداوێکی زەبەلاح کە کاریگەریی لەسەر رووباری نیلی مەزن هەیە. ئاشتی هەیە، لانیکەم بۆ ئێستا، بەهۆی دەستوەردانی منەوە و بەو شێوەیەش دەمێنێتەوە! بە هەمان شێوە، بەمزووانە ئاشتیمان دەبێت لەنێوان ئیسرائیل و ئێران! ئێستا چەندین پەیوەندی و کۆبوونەوە ئەنجام دەدرێن. من زۆر کار دەکەم و هەرگیز دەستخۆشیم لێناکرێ بۆ هیچ شتێک وەرناگرم، بەڵام ئاساییە، خەڵک تێدەگات. با رۆژهەڵاتی ناوەڕاست دووبارە مەزن بکەینەوە.

پاکستان: پاڵپشتیی ئێران دەکەین

6/16/2025 02:05:00 ص

پاکستان تووڕەیە و وەزیری بەرگریی وڵاتەکە هۆشداری دەدات لەوەی ئەگەر "جیهانی ئیسلامی ئێستا یەکنەگرن، هەموومان رووبەڕووی هەمان چارەنووسی یەمەن، ئێران و فەڵەستین دەبینەوە کە لەلایەن ئیسرائیلەوە کراونەتە ئامانج."

خواجە ئاسف، وەزیری بەرگریی پاکستان ئەنجوومەنی نیشتمانیی وڵاتەکەی قسەی کرد، پاڵپشتیی ئێران دەکات لەم جەنگە و "بێدەنگی چیدیکە بژارە نییە."

بە گوتەی وەزیری بەرگریی پاکستان، لەم هێرشەیدا بۆسەر ئێران، ئیسرائیل "بە تەنیا نییە." ئاماژەی بەوەش کرد، ئێران وڵاتێکی دراوسێیە و "پەیوەندیی دێرینی چەندین سەدەمان پێکەوە هەیە."

خواجە ئاسف جەختی لەوە کردەوە، بە هەموو شێوەیەک لەگەڵ ئێران دەبن لەم جەنگە و "بەرژەوەندییەکانی ئێران دەپارێزین، ئێرانییەکان برامانن، ئازار و ناڕەحەتییان ئازار و ناڕەحەتیمانە."

هاوکات وەزیری بەرگریی پاکستان داوای کۆبوونەوەی رێکخراوی هەماهەنگیی ئیسلامی و یەکگرتنی هەموو وڵاتانی ئیسلامیی لە دژی ئیسرائیل کرد.

لە بەشێکی دیکەی قسەکانیدا خواجە ئاسف باسی لەوە کرد، تەنانەت لە وڵاتانی رۆژئاوایش خۆپیشاندان دژی ئیسرائیل دەکرێت، "خەڵک [لە وڵاتانی رۆژئاوا] هۆشیار بوونەتەوە، پێچەوانەی جیهانی ئیسلامی."

هەروەها وەزیرەکەی پاکستان جەختی لە هەڵوێستی نەگۆڕی وڵاتەکەی کردەوە کە دانی بە ئیسرائیلدا نەناوە و پەیوەندیشی لەگەڵیدا نییە؛ داوایشی لە هەموو وڵاتانی ئیسلامی کرد کە پەیوەندی لەگەڵ ئیسرائیل بپچڕن، "ئیسرائیل دەستی بە خوێنی موسڵمانان سوورە و دەبێت ئەو دەستانە رەتبکرێنەوە."

ئەمەش لە کاتێکدایە کە بەرەبەیانی رۆژی 13ی حوزەیرانی 2025 ئیسرائیل بە دەیان فڕۆکەی جەنگی و درۆن هێرشێکی فراوانی کردە سەر ئێران و چەندین فەرماندە، زانای ئەتۆمی و هاووڵاتیی مەدەنیی ئەو وڵاتەی کوشت.

لە وەڵامدا شەوی رابردوو ئێران بە دەیان مووشەک وەڵامی ئیسرائیلی دایەوە و نێوجەرگەی تەلئەڤیڤی مووشەکباران کرد، بەهۆیەوە بە گوتەی بەرپرسانی ئیسرائیلی، دەیان کەس بریندار بوون و سێ کەسیش کوژراون، ئەمەش جگە لە زیانێکی زۆری مادی کە بەر بینا، باڵەخانە، شەقام و ئۆتۆمبێل لە تەلئەبیب کەوتووە.

9 کۆنگرێسمانی ئەمریکی بۆ ترەمپ: دەرفەتێکی گرنگە

6/16/2025 02:01:00 ص

نۆ کۆنگرێسمانی ئەمریکی نامەیەکیان بۆ سەرۆکی وڵاتەکەیان سەبارەت بە جەنگی ئێران و ئیسرائیل ناردووە. ئەوان دەڵێن، هێرسی ئیسرائیل بۆ سەر ئێران دەرفەتێکی گرنگە بۆ رێگری لە ئێران بۆ بوون بە خاوەن چەکی ئەتۆمی.

رۆژی یەکشەممە، 15ی حوزەیرانی 2025، ئەو ئەندامانەی کۆنگرێسی ئەمریکا نامەیەکیان لەبارەی جەنگی ئێران و ئیسرائیل بۆ دۆناڵد ترەمپ، سەرۆکی ئەمریکا نارد.

کۆنگرێسمانەکان بە سەرۆکی وڵاتەکەیان دەڵین، "هێرشی ئیسرائیل بۆ سەر ئێران دەرفەتێکی گرنگە بۆ رێگری لە ئێران لەوەی ببێتە خاوەن چەکی ئەتۆم". دەشڵێن، "ئێران ماوەی دانوستاندنەکانی وەکو تاکتیکێک بۆ بەرهەمهێنانی چەکی ئەتۆم بەکارهێناوە".

رۆژی هەینی، ئیسرائیل هێرشی کردە سەر ئێران و دواتر ئەویش وەڵامی دایەوە. بە گوێرەی ئاماری فەرمی، لە ئێران بەهۆی هێرشەکانەوە 128 کەس کوژراون، لە ئیسرائیلیش 13 کەس گیانیان لەدەستداوە.

نۆ کۆنگرێسمانەکە لە نامەکەیاندا گوتوویانە، "هێرشی ئیسرائیل بۆ سەر ئێران وەڵامی ئەو هەڕەشانەبوو کە لەسەریان بوو". ئاماژەیان بەوەش کردووە، "ئێران بەردەوامە لە پاڵپشتیکردنی حەماس، حیزبوڵـڵا و حووسییەکان. هەروەها، ئێران پاڵپشتی لە گرووپە چەکدارەکان لە عێراق و سووریا دەکات کە لە دوای 7ی تشرینی یەکەمەوە هێرشیانکردووەتە سەر (بنکەکانی) ئەمریکا".

دەقی نامەکە:

بەڕێز سەرۆک ترەمپ

ئێمە زۆر بەپەلە ئەم نامەیەتان بۆ دەنووسین، لە کاتێکدا ئیسرائیل ئۆپەراسیۆنێکی سەربازیی گەورەی دەستپێکردووە و بنکە ئەتۆمییەکان، بنکە مووشەکییەکان و سەرکردایەتیی باڵای ئێرانی کردووەتە ئامانج. ئەم هەنگاوە یەکلاکەرەوەیە دوای دوو مانگ لە هەوڵی دیپلۆماسیی ناسەرکەوتوو دێت و دەرفەتێکی چارەنووسساز پێکدەهێنێت بۆ ڕێگریکردن لە ڕژێمی ئێران لە بەدەستهێنانی چەکی ئەتۆمی. هەوڵەکانی تاران بۆ بەدەستهێنانی چەکی ئەتۆمی و هەبوونی مێژووە درێژەکەی لە هاندانی توندوتیژی لە رێگەی گرووپە بریکارە تیرۆریستییەکانییەوە، وایکردووە خۆی بگەیەنێتە ئەم ساتە.

ڕژێمی ئێران دەیان ساڵە خەریکی چەواشەکردنی کۆمەڵگەی نێودەوڵەتییە و دیپلۆماسی وەک تاکتیکێک بۆ کاتکوشتن بەکارهێناوە، لە هەمان کاتدا تواناکانی بۆ بەرهەمهێنانی چەکی ئەتۆمی پەرەپێداوە. ئێستا، کە ئێران لەژێر هێرشی ڕاستەوخۆی سەربازیدایە و جیهان چاوی لەسەرێتی، ئەمریکا دەرفەتێکی لەبەردەستدایە بۆ کۆتاییهێنان بە خواستە ئەتۆمییەکانی ئێران، ئەویش لەرێگەی دڵنیابوونەوە لە هەڵوەشاندنەوەی تەواوەتیی بەرنامەکەی لە رێگەی دانووستاندنەوە.

هیچ شتێک نییە بە ناوی پیتاندنی ئاشتییانەی یۆرانیۆم کاتێک بابەتەکە پەیوەندی بە ئێرانەوە هەبێت، کە گەورەترین وڵاتی پاڵپشتیکاری تیرۆرە لە جیهاندا. هێرشەکان بۆ سەر دامەزراوەکانی پیتاندنی یۆرانیۆمی ئێران — هەروەها کارگەکانی مووشەک و ناوەندەکانی فەرماندەیی — لە وەڵامی ئەوەدا ئەنجامدران کە بەرپرسانی ئیسرائیل بە "هەڕەشە ناویان دەبەن. سوپای ئیسرائیل مەزەندەی کردبوو کە ئێران پێشوەختە بڕی پێویست یۆرانیۆمی پیتاندووە بۆ دروستکردنی چەندین چەکی ئەتۆمی. ئاژانسی نێودەوڵەتیی وزەی ئەتۆم (IAEA) پشتڕاستی کردەوە کە ئێران بۆ دەیان ساڵە پابەندییەکانی تایبەت بە بڵاونەبوونەوەی چەکی ئەتۆمی پێشێل کردووە. جیهان چیتر ناتوانێت خۆی بە وەهم بخەڵەتێنێت.

ڕەفتارە زیانبەخشەکانی ئێران لە بەرنامە ئەتۆمییەکەی زیاترە. ئێران ڕۆڵێکی بنەڕەتیی هەبوو لە پشتیوانیکردنی هێرشەکەی 7ی ئۆکتۆبەری حەماس بۆ سەر ئیسرائیل، کە کۆمەڵکوژییەکی بێ پاساوی زیاتر لە هەزار کەس و رفاندنی 251 کەسی لێکەوتەوە، لەنێویاندا 12 ئەمریکی، بۆ ناو تونێلەکانی غەززە. ئێران هەروەها بەردەوامە لە پشتیوانیکردنی حەماس، حزبوڵا و حوسییەکان لەو شەڕەی کە دوای ئەو ڕووداوە هەڵگیرسا. ساڵی ڕابردوو، ئێران دوو هێرشی بێ وێنەی کردە سەر ئیسرائیل و سەدان درۆن و مووشەکی ئاراستەی خاکی ئیسرائیل کرد. هەروەها ئێران گرووپە بریکارەکانی لە عێراق و سووریا پڕچەک کرد و ئاراستەی کردن، کە لە دوای 7ی ئۆکتۆبەرەوە هێرشیان کردووەتە سەر بنکەکانی ئەمریکا، لەنێویاندا کوشتنی سێ سەربازی ئەمریکی لە کانوونی دووەمی 2024 ئەمە جگە لەوەی کە ڕژێمی ئێران پلانی تیرۆرکردنی لەسەر خاکی ئەمریکا داڕشتووە و بکوژی بەکرێگرتووە بۆ کردنە ئامانجی هاووڵاتیانی ئەمریکی، لەنێویاندا خودی بەڕێزتان.

لەم چوارچێوەیەدا، ئێمە زۆر نیگەرانین لە بەردەوامیی ئێران لە بەکارهێنانی تاکتیکی کاتکوشتن بۆ دواخستنی گەڕاندنەوەی خێرای سزاكان و دووبارە بنیاتنانەوەی تواناکانی لەژێر پەردەی دانوستاندا. ئەو مۆڵەتە دوو مانگییەی کە ئیدارەکەی ئێوە داینابوو، بەسەرچوو، و کاتی ئەوە هاتووە ئێران بڕیارێک بدات — یان سازشی ڕاستەقینە بکات یان ڕووبەڕووی فشارێکی دیپلۆماسیی لەناوبەر ببێتەوە، وێڕای فشاری سەربازیی ئیسرائیل. داواتان لێدەکەین دەست بە کارکردن بکەن لەگەڵ هاوبەشە ئەوروپییەکانمان بۆ کاراکردنی میکانیزمی گەڕاندنەوەی سزاكان بەپێی بڕیاری 2231ی ئەنجوومەنی ئاسایشی نەتەوە یەکگرتووەکان تا مانگی تەممووز — بۆ دڵنیابوونەوە لەوەی کە مۆڵەتە چارەنووسسازەکەی مانگی ئۆکتۆبەر لەدەست نادەین بۆ دووبارە سەپاندنەوەی سزای گشتگیر بەسەر بەرنامەی چەکی ئێراندا.

پێویستە ئەمریکا هەڵوێستێکی تەواو ڕوون و ئاشکرای هەبێت: سفر پیتاندن، سفر ڕێگە بەرەو چەکی ئەتۆمی. هەر چوارچێوەیەک کە لەم ستانداردە لابدا، رووبەڕووی دژایەتییەکی بەهێزی هەردوو پارت (دیموکرات و کۆماری) لە کۆنگرێسدا دەبێتەوە.

ئێران باجی دەیان ساڵ لە رەفتاری ناسەقامگیرکەر دەدات وەک گەورەترین وڵاتی پاڵپشتیکاری تیرۆر لە جیهاندا. داواتان لێدەکەین کە داوای هەڵوەشاندنەوەی تەواوەتیی بەرنامە ئەتۆمییەکەی ئێران و کۆتاییهێنان بە پشتیوانییەکانی بۆ تیرۆری جیهانی بکەن. ڕژێمی ئێران فێربووە کە سەرپێچی کردن سزای بەدواوەیە. تەنیا کاتێک وەڵامی دەبێت کە رووبەڕووی هەڵوێستێکی پتەو و یەکلاکەرەوە بێتەوە.

سوودانى و ئەردۆغان باسیان لە رێگرى لە پەلکێشکردنى عێراق کردووە بۆ نێو ململانێکان

6/16/2025 01:58:00 ص

سەرۆکوەزیرانى عێراق و سەرۆککۆمارى تورکیا قسەیان لەبارەى دۆخى ناوچەکە و رێگرى لە پەلکێشکردنى عێراق کردووە بۆ نێو ململانێکان. محەممەد شیاع سوودانى رایگەیاند: عێراق پێشێلکردنی سەروەری و بەزاندنی ئاسمانەکەی رەتدەکاتەوە.

ئەمڕۆ یەکشەممە 15ى حوزەیرانى 2025، محەممەد شیاع سوودانی، سەرۆکوەزیرانى عێراق و رەجەب تەیب ئەردۆغان، سەرۆککۆماری تورکیا بە تەلەفۆن قسەیان کردووە.

بە گوێرەى نووسینگەى رۆژنامەڤانیى سەرۆکوەزیرانى عێراق، لەو پەیوەندییەدا هەردوولا باسیان لە پێشهاتەکانی رەوشی ناوچەکە و گرنگی هاوئاهەنگی لە هەڵوێستە جیاوازەکان و یەکخستنی هەوڵەکان کردووە بۆ بەهێزکردنی ئاسایش و سەقامگیریی ناوچەکە.

نووسینگەى رۆژنامەڤانیى سەرۆکوەزیرانى عێراق دەڵێت: "هەردوولا سەرکۆنەی دەستدرێژیی زایۆنییان بۆ سەر کۆماری ئیسلامیی ئێران کردووە و بەپێویستیان زانیوە هەڵوێستێکی یەکگرتوو لە هەموو وڵاتان، بەتایبەتی وڵاتانی ئیسلامی هەبێت بۆ رووبەڕووبوونەوەی سیاسەتە دوژمنکارانەکانی ئەو قەوارەیە".

13ى حوزەیرانى 2025، ئیسرائیل هێرشی کردە سەر چەند پێگەیەکى ئێران و ئەو وڵاتەش بە مووشەک و درۆن بەرپەرچى هێرشەکانى دایەوە، جەنگی نێوانیان بەردەوامە.

بەگوێرەى راگەیێنراوەکە، لەو پەیوەندییە تەلەفۆنییەدا، محەممەد شیاع سوودانى رایگەیاندووە کە عێراق پێشێلکردنی سەروەریی و بەزاندنی ئاسمانەکەی رەتدەکاتەوە و کە بە پێشێلکارییەکی ئاشکرای یاسای نێودەوڵەتی ناوى بردووە.

نووسینگەى رۆژنامەڤانى سەرۆکوەزیرانى دەڵێت: "سەرۆککۆماری تورکیا پشتیوانی لە سەروەریی عێراق کردووە، هەروەها پاڵپشتى لە هەنگاوەکانى حکومەتی عێراق کردووە بۆ پاراستنی سەروەری و رێگریکردن لە پەلکێشکردنى عێراق بۆ نێو گۆڕەپانی ململانێکان".

ئیتاڵیا دەرگای وڵاتەکەی بەڕووی وەبەرهێنەراندا دەکاتەوە

6/15/2025 12:22:00 م

ئیتاڵیا کە سیاسەتی کۆچبەریی تووند کردووە، کەچی هانی خەڵک دەدات بە شێوەی یاسایی بۆ ئەوێ کۆچ بکەن؛ ئەویش بە پێدانی ڤیزای زێڕین (یان ئیقامەی وەبەرهێنان).

یەکێک لەو رێگەیانەی وڵاتانی ئەورووپا هانی گرتنەبەری دەدەن بۆ هاتنی کۆچبەران، ئەوەیە کە سەرمایەیەک بهێنیت و لە یەکێک لەو وڵاتانە موڵکێک یان بزنسێکی پێ بکڕیت و ئیقامەی ئەو وڵاتە بۆ خۆت و ماڵباتەکەت وەدەستبهێنیت.

هەندێک وڵات بەمدواییانە ئەو سیستمەیان لابردووە و دەڵێن، زۆر خراپ سوودی لێ وەرگیراوە. بۆ نموونە ئیسپانیا و پۆرتوگال، یان ماڵتا، زۆر تووندیان کردووە یان نەیانهێشتووە.

بەڵام ئیتاڵیا، کە بەوە بەنێوبانگە لە سایەی حکومەتێکی راستئاژۆی دژە کۆچبەردا رۆژ بە رۆژ سیاسەتی کۆچبەرییەکەی تووندتر دەکات، هانی وەبەرهێنەران دەدات بێنە وڵاتەکەی؛ بۆ نموونە، لەم هاوینەوە ئەوەی 250 هەزار یۆرۆی هەبێت و موڵکێک یان بزنسێک لە ئیتاڵیا بکڕێت، دەتوانێت ببێتە خاوەنی ئیقامەی ئەو وڵاتە، بەتایبەتیش ئەوانەی لە بواری تەکنەلۆژیا و ژیریی دەستکرددا لێزانن یان وەبەرهێنان دەکەن، زووتر ئیقامەکە وەردەگرن.

حکومەتی ئیتاڵیا دەڵێت، ئەو جۆرە ئیقامەیە تاوەکو کۆتایی ساڵی 2026 دەدرێت.

بەفەرمی گرێبەستکردنی لەگەڵ دین هۆیسنی بەرگریکەری لاوی ئیسپانی راگەیاند

6/15/2025 09:41:00 ص

یانەی ریال مەدرید، بەفەرمی گرێبەستکردنی لەگەڵ دین هۆیسنی بەرگریکەری لاوی ئیسپانی راگەیاند. ئەگەرچی یانەکە تێچووی گواستنەوەکەی ئاشکرانەکردووە، بەڵام سەرچاوەکان دەڵێن 58 ملیۆن یۆرۆ لەسەر یانەکە کەوتووە و بەوەش، هۆیسن گرانترین بەرگریکەری مێژووی ریال مەدریدە.

یانەی بۆرنمۆوس لای خۆیەوە، رۆیشتنی ئەو بەرگریکەرەی راگەیاند، لە بڵاوکراوەیەکدا دووپاتیکردەوە، "دووپاتی دەکەینەوە کە دین هۆیسن لە یانەکەمان دەڕوات لە کۆتایی وەرزی ئەمساڵدا، پاشئەوەی یانەی ریال مەدرید، مەرجی سزایی هەڵوەشاندنەوەی گرێبەستەکەی دا".

بەرگریکەرە ئیسپانییە تەمەن 20 ساڵییەکە، بەخێرایی بوونی خۆی لە دونیای تۆپی پێدا سەپاند و گەورەترین خەونی بەدیهێنا کە یارییکردنە بۆ ریال مەدرید.

هۆیسن ساڵی رابردوو چووە بۆرنمۆوس و لەگەڵ ئیندۆنی ئێراولای راهێنەری ئیسپانیی ئەو یانەیەدا درەوشایەوە.

سەرچاوەکان ئاشکرایانکردووە، ئەو یاریزانە کە پێشتر لە یوڤێنتوس بووە، لەلایەن ئەو یانەیەوە بەبۆرنمۆوس فرۆشراوە بە 15 ملیۆن یۆرۆ.

دین هۆیسن، کوڕی دۆنی هۆیسنی یاریزانی پێشووی ئەیاکسی هۆڵەندییە کە لەگەڵ ئەفسانەکانی وەک کلارنس سیدۆرف و پاتریک کلۆیڤەرت یارییکردووە.

کاتێک تەمەنی سێ ساڵان بووە، باوکی ئەو بەتۆمەتی بازرگانیکردن بە کۆکایین دەستگیرکراوە و پێنج ساڵ بەندکردنی بۆ بڕاوەتەوە. بەڵام دۆنیی باوک سووربوو لەسەر بێتاوان بوون و بەتووندی بەرگری لەخۆی کرد و رەتیکردەوە ئەو کارەی کردبێت. ئەو لە دوای تێچوونەوەی بڕیاری دادگا، بێتاوانیی بەدەستهێنا.

ئەو تۆمەتبارکردنەی باوک، بووە خاڵی وەرچەرخان لە ژیانی خێزانەکەدا، ئەوە پاڵی پێوەنان بۆ بەجێهێشتنی ژیانیان لە هۆڵەندا و رووکردنە ئیسپانیا لەپێناو گەڕان بەدوای سەرەتایەکی نوێدا.

لە دوای گەڕانەوەی خێزانەکە بۆ ئیسپانیا، دین پەیوەندی بەئەکادیمیای لاوانی یانەی مەلەگە کرد و تاوەکو تەمەنی 16 ساڵی لەو یانەیە مایەوە، دواتر یانەی یوڤێنتوس گرێبەستی لەگەڵ کرد و پاش ماوەیەک مانەوە لەو یانەیە، بەشێوەی خواستن لەسەرەتای 2024 روویکردە یانەی رۆما.

دین لە رۆما لەگەڵ جۆزێ مۆرینیۆ کاری کردووە، ئەو راهێنەرە لەبارەی ئەو بەهرەمەندەوە دەڵێ، زۆر بەهرەمەندە، لە داهاتوودا یاریزانێکی مەزنی لێدەردەچێت.

لەگەڵ رۆما، هۆیسن لە 14 یاریدا ئاستێکی باشی پێشاندا و دوو گۆڵی تۆمارکرد، ئەوە وای لە ئیراولاکرد سووربێت لەسەر بردنی بۆ بۆرنمۆوس.

سەرەتای ئەو یاریزانە لە یانە ئینگلیزییەکە جێگەی ئومێد نەبوو، لە 10 یاریی سەرەتادا، تەنیا لە دوو یاریدا سەرەکی بوو، بەڵام هەموو شت لە رۆژی 5ی دوانزەی ئەمساڵدا گۆڕا پاشئەوەی گۆڵی بردنەوەی بۆرنمۆوسی بەرامبەر تۆتێنهام تۆماکرد.

لەو ساتەوە، هۆیسن ئیدی بووە بەرگریکەری سەرەکیی تیپەکە و بەشداربوو لە بەدەستهێنانی 11ی یاریی بێ شکست لەگەڵ تیپەکەیدا، کە درێژترین زنجیرەی نەدۆڕانە لە مێژووی یانەکەدا.

هۆیسن دووەم بچووکترین بەرگریکەری ئەمساڵی پرێمەرلیگ بوو، مانگی سێی رابردوو بانگهێشتی هەڵبژاردەی ئیسپانیا کرا. ئەو پێشتر درێسی هەڵبژاردەی هۆڵەندای خوار 19ی پۆشیووە، بەڵام دواتر بڕیاریدا بەیەکجاری یاریی بۆ ئیسپانیا بکات.

هۆیسن لەلایەن زۆر ئەستێرەی دیاری تۆپی پێی جیهانەوە پەسندکراوە، دیارترینیان پاوڵۆ ماڵدینی بەرگریکەری ئەفسانەیی یانەی میلانی ئیتاڵییە.

ماڵدینی لە چاوپێکەوتنێکی تەلەڤزیۆنیدا دەڵێ، باسی ئەو یاریزانانەی کردووە کە پێویستە ریال مەدرید بۆ کاروانی نوێی خۆی لەگەڵ چابی ئەلۆنسۆ گرێبەستیان لەگەڵ بکات.

ماڵدینی دەڵێ، "پێموایە ریال مەدرید زۆر پێویستی بەبەرگریکەری دڵ هەیە، باشترین بژاردەش هۆیسنە".

لەبارەی تایبەتمەندییەکانی هۆیسنەوە ماڵدینی دەڵێ، "توانای بردنی تۆپی لە پشتەوە بۆ پێشەوەی یاریگە هەیە، لە کاتی دروستکردنی یارییدا شوێنگرتنی زۆر باشە. ئەگەر لە سیستمێکدابێت کە لە سێ بەرگریکەر پێکهاتوون، وەک بەرگریکەری راست زۆر نایابە، ئەو بەقاچی چەپ یارییدەکات، بەڵام تۆپ ناردنی راستەی زۆر باشە، یاریزانێکی کامڵە و دەستەوارەیەکی نایاب دەبێت".