گوتەبێژی سەرۆکایەتیی هەرێمی کوردستان رایگەیاند، ئامانجی سەردانی شاندی دەم پارتی "گەیاندنی سوپاس و پێزانین بوو بۆ رۆڵی نێچیرڤان بارزانی، سەرۆکی هەرێمی کوردستان کە هەر لە سەرەتاوە هەڵسا بە ئەرکی ئاسانکاری و هاوکاریکردن بۆ سەرخستنی پڕۆسەکە."
ڕۆژی هەینی، لە رێوڕەسمێکدا لە ئەشکەوتی جاسەنە لە سنووری قەزای دووکان لە پارێزگای سلێمانی، گرووپێک گەریلای پەکەکە وەکو "نیازپاکی" بۆ سەرخستنی پڕۆسەی چارەسەری لە تورکیا، چەکەکانیان دانا و سووتاندیان.
دڵشاد شەهاب، گوتەبێژی سەرۆکایەتیی هەرێمی کوردستان بە میدیاکانی ڕاگەیاند "سەرۆکی هەرێمی کوردستان دووپاتی کردووەتەوە، ئەوەی ئێستا هەیە ئەنجامی ماندووبوون و زەحمەتییەکی زۆرە." ئاماژەی بەوەش کرد، "ئەم پڕۆسەیە ئامانجێکی گرنگ و سەرەکی بووە بەلای سەرۆکی هەرێمی کوردستانەوە."
گوتەبێژی سەرۆکایەتیی هەرێمی کوردستان ئاماژەی بەوەش کرد، "زۆرجار هەوڵ دراوە هەرێمی کوردستان بە شێوەیەک وێنا بکرێت گوایە بەشێکە لە کێشەکان، بەڵام هەمیشە پەیامی نەگۆڕی هەرێمی کوردستان و سەرۆکایەتییەکەی ئەوە بووە، دەمانەوێت هەرێمێکی سەقامگیر و پڕ ئاشتەواییمان هەبێت؛ سەلماندمان نەوەک نابینە سەرچاوەی هەڕەشە، بەڵکو هۆکاری سەقامگیریین لە ناوچەکەدا."
دەقی دیمانەیەکی میدیایی دڵشاد شەهاب، گوتەبێژی سەرۆکایەتیی هەرێمی کوردستان:
پرسیار: لە کۆبوونەوەی شاندی دەم پارتی و نێچیرڤان بارزانی، سەرۆکی هەرێمی کوردستان باسی چی کرا و چۆن باسی پڕۆسەی چەکدانانەکە کرا؟
دڵشاد شەهاب: ئامانجی هاتنی شاندەکە ئەوەبوو کە سوپاسی سەرۆکی هەرێمی کوردستان بکەن بۆ ئەو رۆڵەی هەر لە سەرەتاوە بە ئەرکی ئاسانکاری و هاوکاری سەرخستنی پڕۆسەکە کردوویەتی. سەرۆکایەتی هەرێمی کوردستان خاوەندارێتی ئەم کارەی کرد و میوانداری کردن، هەر لە گەیشتنی میوانەکان تاوەکو بەڕێوەچوونی رێوڕەسمەکە. شاندەکە زۆر سوپاسگوزاربوون بۆ ئەو رۆڵەی سەرۆکی هەرێمی کوردستان. لە کۆبوونەوەکەدا تێڕوانین و چاوەڕوانی خۆیان بۆ پڕۆسەکە خستەڕوو، هەڵسەنگاندن بۆ رێوڕەسمەکەی ئەمڕۆ کرا. ئەوەی ئەمڕۆ بینیمان هەنگاوێکی گرنگ و کردەیی بوو.
پرسیار: پڕۆسەکە چۆن بەڕێوەچوو؟
دڵشاد شەهاب: لە رووی چەندێتییەوە، ئەمە پڕۆسەیەکی سیمبوولی بوو، ژمارەیەکی دیاریکراو و سنووردار بوو، بەڵام لە رووی ماناوە هەنگاوێکی ئێجگار گرنگە و نیشاندانی نیەت باشییە. دوای پەیامەکەی بەڕێز ئۆجەلان بۆ ئەوەی بە کردەیی پەکەکە نیشانی بدات کەوا ئیدی کۆتایی بە ململانێی چەکداری دێت و رێگەیەکی دیکە دەگیرێتەبەر و خەڵکانێکی دیکە رۆڵ دەبینن، ئەویش ئاشتی و بەرقەراربوونی ئاشتەواییە. ئەم پڕۆسەیە کە وەک هەمیشە دووپاتی دەکەینەوە و بڕوای جەنابی سەرۆکی هەرێمیش وابووە کەوا ئەمڕۆش بۆ میوانانی خستەڕوو؛ ئەمە پڕۆسەیەکی سەختە و رێگەیەکی درێژە، هەنگاوی زۆر باش نراون و گۆڕانکاری زۆر گەورە کراوە. ئەگەر بەراورد بکەین بە ساڵانی رابردوو، کۆمەڵێک لەو شتانەی ئێستا روودەدەن، نەوەک هەر لەلای دەوڵەت، بەڵکو لەلایەن حیزبەکانی تورکیاوە، هەندێک لەوانەی کە ئێستا روودەدەن وەکو ئەوە وابوون، کە کەس خەیاڵی ئەوەشی نەکردبێت شتێکی لەوجۆرە بێتەئاراوە. کەواتە گۆڕانکارییەکی زۆر گەورە بووە.
پرسیار: ئەم پڕۆسەی ئاشتی و چەکدانانە چ سوودێکی بۆ هەرێمی کوردستان دەبێت؟
دڵشاد شەهاب: لە چەند روویەکەوە ئەم پڕۆسەیە پەیوەستە بە ئێمەوە. یەکەم، بەرقەراربوونی ئاشتی لەم ناوچەیە هەمووان لێی سوودمەندن. تورکیا وڵاتێکی کاریگەری ناوچەکەیە و دراوسێی ئێمەیە. بەداخەوە ئەو ململانێ چەکدارییەی کە هەبووە زەرەرمەندی یەکەم هەرێمی کوردستان بووە، سەدان گوندمان زیانیان بەرکەوتووە و زیانی گیانیشمان هەبووە، جگە لە زیانە ئابوورییەکان، ئەمانە کاریگەری راستەوخۆ بوون. کاریگەرییە ناڕاستەوخۆکانیش هەیە و ئەوەیە کە بەرقەراربوونی ئاشتی و پێکەوەژیانی گەلانی ناوچەکە ئارامی و سەقامگیری دەداتە ناوچەکە و ئەوەش ئامانجی هەرێمی کوردستانە. سەرەڕای هەموو ناکۆکییەکانی حیزب و لایەنەکانی تورکیا، بەڵام هەموو کۆکن لەسەر رۆڵی گرنگ و کاریگەری هەرێمی کوردستان و سەرکردایەتییەکەی و جەنابی سەرۆکی هەرێمی کوردستان.
پرسیار: رۆڵی هەرێمی کوردستان بۆ بەردەوامیدان لە پڕۆسەی ئاشتی لە داهاتوودا چی دەبێت؟
دڵشاد شەهاب: ئەمڕۆ جەنابی سەرۆکی هەرێمی کوردستان دووپاتیکردەوە، ئەوەی کە ئێستا دەیبینین ئەنجامی ماندووبوون و زەحمەتییەکی زۆرە. ئەم پڕۆسەیە ئامانج بووە بەلای سەرۆکی هەرێمی کوردستانەوە. زۆر زەحمەت بووە لەو ئاڵۆزییانەی کە هەبوون باس لە ئاشتی بکرێت، خۆشبەختانە هەمووان دڵخۆشن بەوەی کە ئەنجامێک دەبینن، بەڵام هێشتا زۆر شت ماون، رۆژێک دادێت راستییەکانی ئەم پرسە دەخرێنەڕوو کە چ زەحمەتییەک بینراوە و چ هەوڵێک دراوە.
پرسیار: هەنگاوەکانی داهاتوو چۆن دەبن؟
دڵشاد شەهاب: دڵخۆشین کە یەکەمین هەنگاوی کردەیی لە خاکی هەرێمی کوردستان دەبینین، پاڵپشتی خۆشمان بۆ پڕۆسەکە دووپات دەکەینەوە. ئەمە ئاماژەیەکە بۆ هەرێمی کوردستان کە رۆڵی لە ئاشتی و سەقامگیری ناوچەکەدا هەیە، زۆرجار هەوڵ دراوە کە هەرێمی کوردستان بە شێوەیەک وێنابکرێت کە گوایە بەشێک بێت لە کێشەکان، بەڵام هەمیشە پەیامی نەگۆڕی هەرێمی کوردستان و سەرۆکایەتییەکەی ئەوەبووە کە دەمانەوێت هەرێمێکی سەقامگیر و پڕ ئاشتەواییمان هەبێت، دەمانەوێت پەیوەندی باشمان لەگەڵ دەوروبەر و دراوسێکانمان هەبێت، نەوەک نابینە سەرچاوەی هەڕەشە بەڵکو سەلماندمان هۆکاری سەقامگیرین لە ناوچەکەدا. ئەمڕۆ باسی هەنگاوەکانی داهاتوو کران، لە هەوڵ و پەیوەندی بەردەوامین لەگەڵ هەموو لایەنەکان. جەنابی سەرۆکی هەرێمی کوردستان داوای لە میوانانی ئەمڕۆ کرد، ئەم هەنگاوە پشوو درێژی دەوێت. چاوەڕوان دەکرێت لە ئاییندەیەکی نزیکدا دەوڵەت هەنگاو بنێت و کۆمیتەیەکی فەرمی لە پەرلەمانی تورکیاوە بنیات بنرێت.
پرسیار: قۆناخەکانی داهاتووی چەکدانان هەر لە هەرێمی کوردستان دەبێت؟
دڵشاد شەهاب: بڕیاری چەکدانان دراوە. بەڕێز ئۆجەلان بە روونی لە پەیامەکەدا داوای کرد و پەکەکەش دەستیپێکرد، ئەمڕۆش بەشێوەیەکی سیمبوولی چەکدانان کرا، مەرج نییە هەرچەند هەفتە جارێک لە شوێنێکدا چەک دابنرێت، گرنگ ئەوەیە ئەم پڕۆسەیە دەستیپێکردووە و نیەت باشییەکە هەستیپێکرا. میوانەکان زۆر دڵخۆش بوون و هەست دەکەین دەوڵەتی تورکیاش زۆر پێی خۆشە کە پڕۆسەکە بە سەرکەوتوویی بەڕێوەدەچێت.
ليست هناك تعليقات
إرسال تعليق