KURDPLAT

ئەمڕۆ یەکشەمە ۷ ی ٤ ی ۲٠۲٤ ، وەفدێکی نەتەوە یەکگرتوەکان سەردانی پارتی دیموکراتی کوردستانیان کرد، لە لایەن د.هێمن هەورامی ئەندامی مەکتەبی سیاسی و بەرپرسی مەکتەبی رێکخستن و بەرپرسانی هەڵبژاردنی پارتیەوە پێشوازیان لێ کراوە، .شاندەکەی یۆنامی بە سەرۆکایەتی کۆلدیا کۆردۆن جێگری جەنین پلاسخارت بۆ کاروباری سیاسی و هەلبژاردنەکان و ئەندامێتی پسپۆرانی یۆنامی بۆ کاروباری هەڵبژاردن بوو.

ئەم کۆبوونەوەیە لە سەر پێشنیازی جەنین پلاسخارت نێردەی تایبەتی سکرتێری گشتی نەتەوەیەکگرتووەکان بووە کە لە دوایین سەردانی بۆ هەرێمی کوردستان و کۆبوونەوەی لەگەل بارزانی بووە کە تیایدا داوایانکردوە شاندیکی پسپۆر و تەکنیکی یۆنامی بێنە هەولێر و لەگەل شاندێکی پارتی لەسەر راو و سەرنج و تیبینی و بۆچوونەکانی پارتی بۆ هەڵبژاردنی پەرلەمان گفتوگۆ بکەن.

لەم دانیشتنەدا، شاندی یۆنامی جەختیان لەگرنگی و بایەخی بەڕێوەچوونی هەلبژاردن کردۆتەوە.

بە پێی زانیاریەکان پارتی تەواوی نیگەرانی و ڕاو سەرنجەکانی خۆی لە بارەی هەڵبژاردنەوە داوەتە نوێنەری نەتەوە یەکگرتوەکان.

 سالار فەتاح

هەر گەلو نەتەوەیەک لەبارودۆخی مێژوویی ئەم میلەتەی ئێمەدابێت کە بەهەزاران قوربانی داوە بۆ ئازادی و سەربەخۆیی، بەنرخترین بەهای ژیان کەگیانیەتی بەخشیبێتی لەو پێناوەدا ، زۆر ئاساییە بیر لە چەندین ڕێگەی تری سیاسی و ئابوری بکاتەوە بۆ گەشتن بەسەربەخۆیی. فرۆشتنی نەوتی هەرێمیش لەپێناو ئابوری سەربەخۆدا بەو ناونیشانە نەک کارێکی خراپ نەئەبوو بگرە پێویستیەکی سیاسی و ئابوری ئەبوو بەمەرجێ:

یەکەم: بازارگەرەکەت و گوازەرەوەکەت گەورەترین داگیرکەری کوردستان نەبوایە کە خۆی پێ بەهێزکات ،هەرێمیش بەناوی سەربەخۆییەوە گوایە خۆی لەداگیرکەرێک ڕزگارکا ، کە حەقی قانونی ودەستوریتان لەناو ئەو وڵاتەدا لەسەر یەک هەیە بەڵام خۆت بخەیتە کۆشی داگیرکەرێکی سامناکترەوە،. تەنها لەبەر ئەوەی سیاسیە باڵادەستەکەی هەرێم میرێکی قەڵەمڕەوەکەیبیت. 

سیاسەتی لەمجۆرە نەک هەڵەیە،بگرە تاوانیشە چونکە داگیرکەرێکی پێ بەهێز دەکەی خۆت سەربەخۆناکات، خۆت وەک حاکم دەکاتە بەشێک لەسیاسەتی داگیرکاریانەی خۆی و گەلەکەت دەکاتە قوربانی لەچەندین ڕێگەو بوارەوە، بۆیە هەموو ئەو نەوتەی لەڕێی تورکیاوە برا نەک هەنگاوێک لە سەربەخۆیی نزیکی نەکردینەوە نەلەڕوی ئابوریەوە نەلەرووی سیاسیەوە تەنانەت هێندەی سەردانەکەی مام جەلال بۆ سەرگۆڕی ئەتاتورک کاریگەری ئەرێنی لەسەر دۆزی سیاسی کورد نەبوە. کە نەیبوە.

دوەم: گریمان تاقە ڕێگای ئابوری سەربەخۆکەت تورکیایە، خۆ دەبو ئابوری سەربەخۆ کاریگەری نەرێنی و خراپ لەسەر پرسی هەستی سەربەخۆیی لەلای هاونیشتمانیانی هەرێم نەکوژێ .. لەکاتێکدا لەئاست پشتیوانیکردنی هەرێمدا کوشتیو بەڵگەش کۆمێنتو شایی هاوڵاتیانی هەرێم ببینن کە دەوترا نەوت ڕادەست دەکرێتەوە تاچەند پێی دڵخۆش بوون. هۆکاری ئەم دڵخۆشیە حەزکردن نیە بۆ دیلیەتی ، بەڵکو ئەوە چاوچنۆکی سیاسیو ئابوری نەوتفرۆشەکانی هەرێمە کە خۆیانیان پێ دەوڵەمەند کردو داگیرکەریان پێ دەڵەمەندکردو بازرگانانی شەڕیان پێ دەوڵەمەندکرد و نادادیەکی گەورەیان لەهەرێم پەرە پێدا کەبەوکردارانەیان لەجێی بایەخی سەربەخۆیی بایەخی پارەو بژێوییان لەناخی ئەو هاوڵاتیانەدا چاند کە پێشتر ئامادەی قوربانیدان بون بە گیانودڵ لەپێناو سەربەخۆییدا . بەلام سیاسەتی نەوتیان بەجۆرێک هەمو دنیا زانی خۆیانو نەوەکانیان بونە ملیاردێر لەسەر خوێنی شەهیدان ، کەچی بنەماڵەی شەهید تاڵاو چو بە قورگیا . گەر خۆیان سودمەند نەبونایە، با لەڕێی داگیرکەرانیشەوە بیانفرۆشتایە بەڵام هەرێم میزانیەی پڕبوایەو گیرفانی مەسئول بنەماڵەکانی نەوتفرۆشە سیاسیەکان بەتاڵ بوایە. ئێستە هەڵوێستی خەڵکی بەمجۆرەی ئێستە نەدەبو پارتیو یەکێتیش. شەڕی هەژماری منیان نەدەکرد.

سێیەم:

ئەو دوخاڵەی سەرەوە پرسی ئابوری سەربەخۆیان والێکرد لە مافەوە ببێ بەتاوانێک کە دەرهەق بە میلەتەکەی خۆت کردبێتت ، لەکاتێکا من دڵنیام ئەگەر سیاسەتی ئابوریان وەک لە خاڵی دوەمی ئەم نوسینەدا باسکراوە بەو جۆرە نەبوایە هەڵە نەدەبو چونکە ُئەوکاتە میلەت دەیوت( من خوێنم لەپێناو سەربەخۆیدا داوە نەوت چیە ئەوەتانێ بۆ خزمەتی هەرێم بەکارهاتوەتەوە با کەمیش بوایە) .. ئەوسا گەر یاسای نێودەوڵەتیش دژمان بوایە میلەت وەک چۆن تاکاتی ڕاپەڕین و تاشەڕی داعشیش لەپێناو ئازادیدا خوێنی بەخشی ئاواش دیسان لەئێستادا داکۆکی لە سیاسەتی ئابوری سەربەخۆ دەکرد بەخوێن. و ئەمریکاش ڕێزی لێدەگرت و جورئەتی شەیرکردنی وشەی کارتۆنی نەدەبو. ڕیفراندۆمیش بەودەردە نەدەچوو، کە بلاسخارت بڵێ لە ڕیفراندۆمەوە قەوارەی هەرێم شکاوە...

دادگای فیدراڵیش چەکوشەکەی نەدەخستەکار ...

خوێنەر دەزانێ گیانی سەربەخۆیی نیشتمانی چی لێهاتوە بەداخەوە . هۆکارەکەشی ڕونکراوەتەوە بۆیە ئەگەر نەوتفرۆشتن وەک سیاسەتی ئابوری سەربەخۆ کە مافێک بوو . سەرەنجام بەجۆرێ پەیرەوی کرا گۆڕا بەتاوان بۆیە بەبۆچونی من ئابوری سەربەخۆ وە بەوجۆرەی کراوە هەڵەی سیاسی نیە بگرە تاوانی سیاسیو ئابوریە ،چونکە میلەت قەرزارکراوە ، 

هەزاران تاوانی کۆمەڵایەتی بەهۆیەوە ئەنجام دراوە، 

گیانی دامەزراوەیی لەلای تاک تێکدراوە. 

هەزاران ماڵ ئاوارە کراوە.

داگیرکەری پێبەهێزکراوە

گیانی نیشتمانی پێ لاواز کراوە

لەم قۆناغە بەدواوە تەنها ئەو سیاسیانە مافیان هەیە باسی سەربەخۆیی بکەن کە سەرمایەیان وەک سەرمایەی هاوڵاتیەکی بژێوی مام ناوەند یا هەژاربێت نەک وەک بازرگانەکان..

گەر ویستت باسی سەربەخۆیی هەرێم بکەی یەکەم سەیری گیرفانتکە گەر وەک زۆرینەبوی ئەوەتۆ خاوەنی سەربەخۆییت، نەک سەرمایەدارە سەرەخۆرەکانی نەوت. 

ئەم بنەمایەش پێویستە وەک بنەمای بوژانەوەی پرسی کورد لە عێراقدا زیاتر کاری پێ بکرێت .

ئەولەویەت بدرێ بە بوژانەوەی داهاتی کەسی موجەخۆران تا دڵنیایی باڵ بکێشێتەوە بەسەر هاوڵاتیاندا. خەمی دەخیلو شەخسیەکەی چەند بازرگانێکی سیاسیمان نەبێ . کە نا ئەمرۆش کاری لەسەر دەکەن و پێیان وایە وەرگرتنی پۆستێک لەکۆمپانیای باوەپیارەی نەوتا، دەسکەوتێکی ترە .. هەڵەیە پێتان وابێ ئابوری حزبو کەسە یەکەمەکانی حزب هەڵکشێ زامنی سیاسەتی سەربەخۆیی دەکات . 

سیاسەتی سەربەخۆیی ئابوری.، پێش هەرشتێک پێویستە لە پەیڕەوکردنی سەربەخۆیی تاک بەتاکی هەرێمەوە بینابکرێت بەجۆرێک هەستی نادادی لەهەرێم بسڕدرێتەوە 

ئەوە گرنگترینو بەنرخترین زامنی سەربەخۆییە..

کۆمیسیۆنى باڵاى سەربەخۆى ھەڵبژاردنەکانى عێراق لیژنەیەکى پێکهێنا بۆ وەرگرتنى داواکاریى چاودێرانى نێودەوڵەتى بۆ هەڵبژاردنى پەرلەمانى کوردستان، هاوکات رێوشوێنەکانى سکاڵا و تانەکانیشی پەسند کرد.

جومانە غەلاى، گوتەبێژى کۆمیسیۆنى باڵاى سەربەخۆى ھەڵبژاردنەکانى عێراق بە تۆڕى میدیایی رووداوى راگەیاند: "ئەنجوومەنى کۆمیسیاران لیژنەى دیاریکردنى چاودێرانى بیانیى بۆ هەڵبژاردنى پەرلەمانى کوردستان دیاریکرد، لیژنەکە بە سەرۆکایەتیی فەتاح محەممەد حوسێن، ئەندامى ئەنجوومەنى کۆمیسیارانە."

جومانە غەلاى گوتى، "بەم نزیکانە لیژنەکە دەست دەکات بە وەرگرتنى داواکاریى چاودێرانى نێودەوڵەتی و نوێنەرى لیست و هاوپەیمانێتییە سیاسییەکان و فۆڕمێکى تایبەت بۆ ئەو مەبەستە بڵاودەکرێتەوە بۆ ئەوەى چاودێران پڕی بکەنەوە."

رۆژی 10ى حوزەیرانى 2024 دیاریکراوە بۆ هەڵبژاردنى پەرلەمانى کوردستان، کە لەلایەن کۆمیسیۆنى باڵاى سەربەخۆى ھەڵبژاردنەکانەوە سەرپەرشتی دەکرێت.

گوتەبێژى کۆمیسیۆنى باڵاى سەربەخۆى ھەڵبژاردنەکانى عێراق راگەیاند: بۆ چاودێرانى نێوخۆیی، مۆڵەت دەدرێتە تیمى چاودێرى کە دەبێت لە رێکخراوەکانى کۆمەڵگەى مەدەنى و رێکخراوە ناحکومییەکان تۆمارکراو بن.

بڕیارە 8ى نیسان لە بەغدا تیروپشکى بۆ ژمارەى هاوپەیمانێتی، پارت و بەربژێرە سەربەخۆکانی بەشدار لە هەڵبژاردنی پەرلەمانى کوردستان بکرێت.

4ى نیسان ئەنجوومەنى کۆمیسیارانى کۆمیسیۆنى باڵاى سەربەخۆى هەڵبژاردنەکانى عێراق رەشنوسی رێوشوێنەکانى سکاڵا و تانەکانى سەر هەڵبژاردنى پەرلەمانى کوردستان پەسند کرد کە لەلایەن لیژنەى یاسایی کۆمیسیۆنەوە ئامادە کرابوو.

مامۆستایانی ناڕازی لە ڕوونکردنەوەیەکدا هۆشداریدەدەن سەبارەت بە هەڵنەوەشاندنەوەی فەرمانەکانی سزاکان و ٢٥ی٤ی٢٠٢٤یان وەك دواوادە داناوە بۆ ڕوونکردنەوەی ‌هەڵوێستی بەرپرسانی پەروەردەیی سەبارەت بە فەرمانی سزایی مامۆستایان، لە ڕاگەیەنراوەکەدا هاتوە (ئێمە لێرەوە وێڕای جەختکردنەوە لە ڕەدکردنەوەی سزاکان، هەر کردارێکی ناپەروەردەییانەی حیزبیانە ڕەد دەکەینەوە کە بەرامبەر مامۆستایان ئەنجامدراون و دەدرێت، وە پێشمانوایە وەزارەتی پەروەردە خراپ مامەڵەیان لەگەڵ هەڵوێستی بەرپرسانەی مامۆستایانکرد بۆ تێپەڕاندنی ساڵی خوێندنی ٢٠٢٣ بۆ ٢٠٢٤)

دەقی ڕوونکردنەوەکە

هاوڵاتیانی ستەم لێکراو

مامۆستایان و فەرمانبەرانی خاوەن هەڵوێست

لەسەروبەندی ناڕەزایی و بایکۆتی ڕەوای مامۆستایاندا بەڕێوبەرایەتیەکانی پەروەردە لە بری ئەوەی لە خەمی مامۆستایاندابن و پشتیوانیمان بکەن، بە پێچەوانەوە بە فەرمانی حیزبیانە دەستیانبرد بۆ سزادانی مامۆستایان و ژمارەیەکی زۆر مامۆستای بەهەڵوێست لەسەرجەم پەروەردەکان سزادران و نایاساییانە و نا پەروەردەییانە مامەڵەیان لەگەڵ کرا.

لە ڕابردوودا لە رێگەی تیمی پارێزەرانی خۆبەخش و دیدارە جیاوازەکانەوە هەوڵماندا بۆ سڕینەوەی سزاکان، بەڵام بەداخەوە تا ئێستاکە وێڕای هەندێك بەڵێنی زارەکی بەڵام هێشتا فەرمانەکانی سزادانی بەکۆمەڵ لە شوێنی خۆیان ماون و هەرکات بیانەوێت دەتوانن بیانخەنە نێو مەلەفی مامۆستاو فەرمانبەرانەوە، ئەوە وێڕای گواستنەوەی زۆرەملێی ژمارەیەك لە مامۆستایان لە قوتابخانەیەکەوە بۆ قوتابخانەیەکیتر و بانگهێشتکردنی مامۆستایان بۆ لێپرسینەوە لەدەرەوەی بنەما یاساییەکان.

ئێمە لێرەوە وێڕای جەختکردنەوە لە ڕەدکردنەوەی سزاکان، هەر کردارێکی ناپەروەردەییانەی حیزبیانە ڕەد دەکەینەوە کە بەرامبەر مامۆستایان ئەنجامدراون و دەدرێت، وە پێشمانوایە وەزارەتی پەروەردە خراپ مامەڵەیان لەگەڵ هەڵوێستی بەرپرسانەی مامۆستایانکرد بۆ تێپەڕاندنی ساڵی خوێندنی ٢٠٢٣ بۆ ٢٠٢٤

لە کۆتایدا هیوادارین بەرپرسانی پەروەردە تەنها یەك جار بە ئەرکی پەروەردەییانەی خۆیان هەستن و تەواوی فەرمانەکان هەڵوەشێننەوە و لەوە تێبگەن کە مامۆستایەك داوای مافی خۆی بکات چۆن سزادەدرێت؟ کە تەنها لە هەردوو پەروەردەی ڕۆژئاوا و ڕۆژهەڵاتی سلێمانی زیاتر لە ٣٠٠٠ سێ هەزار مامۆستا بە (غیاب) سزادراوە، وێڕای گواستنەوەی زۆرەملێ کە ڕوویەکی دیکتاتۆریانەی پەروەردەی نیشانداین و لە زۆربەی پەروەردەکان بڕیاری سزادان جێبەجێ کراوە

بۆیە هیوادارین تا ٢٥/٤/٢٠٢٤ بڕیار لە هەڵوەشانەوەی سزاکان بدرێت و ئەو ڕێگا هەڵانە ڕاستبکرێنەوە کە بەرامبەر مامۆستایان گیرانەبەر، بۆ ئەوەی ناچار نەبین فشارەکانمان دەستپێبکەینەوە و ئەو ماوە کەمەی کەماوە بێ گرفت تێپەڕ ببێت، چونکە دڵنیابن پرسی سزادانی مامۆستایان بە ساڵی داهاتوو ناسپێرین و پێویستە لەم ساڵدا نیگەرانیەکانی مامۆستایان کۆتاییان بێت

مامۆستایان و فەرمانبەرانی ناڕازی سلێمانی

٤/٤/٢٠٢٤

هاووڵاتییانی فەلەستین لە کەرتی غەززە بەرەو ئەو شوێنانە دەڕۆن کە بارهەڵگرەکانی رێکخراوە مرۆییەکان ئارد بەسەر هاووڵاتییاندا دابەش دەکەن.

وەک خۆیان باسی دەکەن، هەندێکجار دەبێت چەند کاژێرێک چاوەڕێ بکەن تاوەکو بڕێک ئارد لە رێکخراوەکان وەردەگرن.

هاووڵاتییەکی فەلەستینی دەڵێت، "ئێمە شەو تا بەیانی چاوەڕێ دەکەین ئەو ئاردە وەربگرین؛ لەسەر شەقامەکان دەخەوین، بە سەرما و لەسەر لم دەمێنینەوە و بەرگەی هەموو هەموو سەختییەکان دەگرین بۆ ئەوەی خۆراک بۆ خێزانەکانمان دابین بکەین، بەتایبەتی بۆ منداڵەکانمان."

بەهۆی جەنگی غەززەوە بەشێکی زۆری نانەواخانەکانی کەرتەکە داخراون و ئەوانەشی کە کار دەکەن بە نرخێکی زۆر نان بە هاووڵاتییان دەفرۆشن کە خەڵک توانای کڕینیانی نییە، بۆیە هاووڵاتییان خۆیان نان دروست دەکەن.

نەتەوە یەکگرتووەکان هۆشداری داوە لەوەی زیاتر لە 600 هەزار هاووڵاتی لە کەرتی غەززە رووبەڕووی برسێتیی کوشندە بوونەتەوە و لە هەر شەش منداڵێکیش یەکێکییان تووشی بەدخۆراکی بووە.

هاووڵاتییەکی دیکەی فەلەستینی دەڵێت، "ئێمە چووین ئارد وەربگرین، بەڵام لە خاڵی پشکنین دوو رۆژ ماینەوە. ئەو ئاردەی هەیە، درەنگ دەگاتە دەستمان و بەشی هەمووشمان ناکات. کێشەکە تەنیا ئارد نییە، کێشەی کەمی میوە، گۆشت و پێداویستییەکانی دیکەمان هەیە".

لە ساڵی 2024دا، نەتەوە یەکگرتووەکان تەنیا 11 کاروان خۆراکی گەیاندووەتەوە کەرتی غەززە. لە کاتێکدا رێکخراوەکە دەڵێت، نزیکەی ملیۆنێک و 450 هەزار کەس لە دانیشتووانی ئەو ناوچەیەی فەلەستین پێویستیان بە هاوکاریی مرۆییە.

سەرۆکوەزیرانی ئیسرائیل کەناڵی جەزیرەی قەتەری بە کەناڵێکی "تیرۆریستی" ناودەبات و بەڵێنیش دەدات کە کەناڵەکە لەنێو ئیسرائیل قەدەخە دەکات.

رۆژی دووشەممە، 1ـی نیسانی 2024، بنیامین نەتەنیاهوو، سەرۆکوەزیرانی ئیسرائیل لە پۆستێکی تۆڕی کۆمەڵایەتی ئێکس گوتی: "کەناڵی جەزیرەی قەتەری چیدیکە لە ئیسرائیل پەخشی نابێت".

رۆژی دووشەممە، 1-4-2024 پەرلەمانی ئیسرائیل ناسراو بە 'کنێست' پڕۆژەیاسایەکی پەسند کرد کە تێیدا رێگە بە حکومەتی وڵاتەکە دەدات ئەو دەزگا میدیایانەی قەدەخە بکات کە وەکو هەڕەشە بۆ سەر ئیسرائیل سەیر دەکرێن.

پڕۆژەیاساکە بە دەنگی 70 دەنگی بەڵی و 10 دەنگی نەخێر پەسند کرا.

سەرۆکوەزیرانی ئیسرائیل گوتی: "دەمەوێت دەستەجێ بەگوێرەی یاسا نوێیەکە چالاکییەکانی کەناڵەکە بوەستێنم."

بڕیارەکەی پەرلەمانی ئیسرائیل کاردانەوەی ئەمریکای لێکەوتەوە؛ کارین ژان پیێر، گوتەبێژی کۆشکی سپی لە کۆنفرانسێکی رۆژنامەڤانیدا ئاماژەی بەوە کرد، بڕیارەکە "جێگەی نیگەرانییە".

ئەوە لەکاتێکدایە، لە سەرەتای دەستپێکردنی جەنگەکەوە قەتەر بەردەوام رۆلی نێوەنکاری لە جەنگەکەدا بینیوە و هەوڵیداوە کە ئاگربەست لە نێوان حەماس و ئیسرائیل بکرێت.

پێشتر، چەندین جار شلۆمۆ کەراهی، وەزیری گواستنەوەی ئیسرائیل "کەناڵی جەزیرەی بە بڵاوکردنەوەی هەواڵی ناراست" و "بڵاوکردنەوەی پڕوپاگەندە بۆ حەماس" تۆمەتبار کردووە.

بەرپرسانی کەناڵەکەش چەندین جار تۆمەتەکانی حەماسیان رەتکردووەتەوە و رایانگەیاندووە، "ئیسرائیل بە سیستەماتیکی کارمەندانی کەناڵەکە" لە کەرتی غەززە دەکاتە ئامانج.

لە کانوونی یەکەمی رابردوو، وێنەگری سامر ئەبو دەقە، وێنەگری کەناڵی جەزیرە لە هێرشێکی ئیسرائیلدا لە غەززە کوژرا و وائیل دەحدوح، بەرپرسی کەناڵی جەزیرە لە کەرتەکە چەند ئەندامێکی خێزانەکەی بە بۆردوومانی ئیسرائیل کوژران و خۆیشی بریندار بوو.

بەگوێرەی دەستەی پاراستنی رۆژنامەڤانان، لەوەتەی جەنگی غەززە دەستیپێکردووە، تاوەکو ئێستا 90 رۆژنامەڤانی فەلەستینی کوژراون و 16ـی دیکەش دەستگیر کراون.

جەنگی غەززە دوای ئەوە دەستیپێکرد کە لە 7ی تشرینی یەکەمی پار، چەکدارانی بزووتنەوەی حەماس هێرشیانکردە سەر ئۆردووگا جوونشینەکانی دەوروبەری کەرتی غەززە. لەو رۆژەدا، بە گوتەی سوپای ئیسرائیل، هەزار و 160 کەس کوژران.

لە بەرامبەردا ئیسرائیل وەڵامی هێرشەکەی بە بۆردوومانکردن و هێرشکردنەسەر کەرتی غەززە دایەوە. بە گوێرەی تەندروستیی کەرتی غەززە، بەهۆی هێرش و بۆردوومانەکانی ئیسرائیلەوە 32 هەزار و 845 کەس کوژراون و زیاتر لە 75 هەزار و 392 کەسی دیکەش برینداربوون.

سوپای ئیسرائیل رۆژی دووشەممە، 1ـی نیسانی 2024 رایگەیاند، لە سەرەتای جەنگەکەوە 600 سەربازیان کوژراون.